«Bilim týraly» zańda oqýshylar men ustazdardyń qaýipsizdigin qamtamasyz etý týraly bir aýyz sóz joq. Bul týraly Senat depýtaty Nurtóre Júsip Álıhan Smaıylovqa joldaǵan saýalynda aıtty, dep habarlaıdy “Adyrna” ulttyq portaly.
Depýtat Petropavldaǵy 9-synyp oqýshysynyń mektepke balta men pyshaq alyp kelip, 3 balany jaraqattaǵanyn eske salyp ótti.
"Bul tótenshe jaǵdaılardy boljaý júıesindegi, erte aldyn alýdaǵy kúrdeli problemalarǵa nazar aýdardy. Elimizde bul baǵyt boıynsha mańyzdy ǵylymı baza joq. Oqýshylardyń psıhologııalyq portretin jasaý, otbasynyń áleýmettik mártebesin anyqtaý kezinde depressııaǵa nemese agressııaǵa beıim balalardy aldyn-ala oqshaýlaý eskerilmeıdi", - dedi Nurtóre Júsip Senattyń jalpy otyrysynda.
Onyń pikirinshe, kópsatyly keshendi qaýipsizdik júıesin jasaýdy kún tártibine shyǵarý kerek.
"Álemde mundaı tájirıbeler bar. Qaı el bolsyn bul máselege asqan jaýapkershilikpen qaraıdy. Máselen Qytaıda mektepke tek oqýshynyń da ata-ananyń da sýreti bar arnaıy kýálikpen kirýge bolady. Kez kelgen oqý ornynda kúzetshi kabınkasy qoıylǵan. Kelgen adamnyń kýáligi bolmasa, tek muǵalim ǵana ertip kire alady.
Franııada oqýshylarǵa ǵımaratqa alyp kirýge bolmaıtyn zattar tizimi jazylǵan nusqaýlyq beriledi. Sabaq arasynda rıýkzaktar men portfelder tekseriledi. Jylyna 2 ret antıterrorıstik jattyǵý sabaqtary ótkiziledi", - dedi depýtat.
Nurtóre Júsip «Bilim týraly» zańda oqýshylar men ustazdardyń qaýipsizdigin qamtamasyz etý týraly bir aýyz sóz joǵyn da atap ótti.
Sizden (Úkimet basshysy Álıhan Smaıylovtan – avtor) elimizdegi bilim berý mekemelerinde krımınaldyq jáne terrorıstik sıpattaǵy qaýip-qaterden qorǵaıtyn, oqý oryndaryndaǵy oqýshylardy, muǵalimder men qosalqy personaldy saqtaýǵa arnalǵan qaýipsizdikti qamtamasyz etýdiń tıimdi júıesin jasaý jóninde shuǵyl keshendi sharalar qabyldaýdy suraımyz, – dedi senator.
Aıta keteıik, buǵan deıin Oqý-aǵartý mınıstrligi Petropavldaǵy jaǵdaıdan soń elimizdegi barlyq mekteptiń qaýipsizdigi tekseriletinin habarlaǵan
