Qazaqstandyq jýrnalıst Mıhaıl Kozachkovqa taǵylǵan aıyptar sany qysqardy. Bul týraly Kozachkov “Dnevnık Arestanta” Telegram arnasynda jazdy, dep habarlaıdy “Adyrna” ulttyq portaly.
“Meni birneshe qylmys jasady degen kúdikpen ustady jáne eki aıǵa jýyq tergeý ızolıatorynda boldym. Osy ýaqyt ishinde kóptegen qyzyqty jáne jaqsy adamdarmen tanystym, ómirdiń jańa qyrlaryn bildim dep aıta alamyn. 14-15 jylǵa sottalý qaýpi tónip turǵan jigitterdiń 11 jylǵa bas bostandyǵynan aıyrylý jazasy taǵaıyndalǵan kezde qýanǵanyn kórdim. Oıynshyqtardy urlady degen kúdikpen ustalǵan balalar úıiniń tárbıelenýshisi qalaı kúızelgenin kórdim: onyń isi boıynsha zalal 200 myń teńgege deıin ósip ketken, ol mundaı aqshany qaıdan tapsyn? Kisi óltirgeni úshin úkimin kútip turǵan aýyr dertti adamdy qandaı sózdermen qoldaý keregin bilmeı dal boldym. Bir sózben aıtqanda, bolashaq maqalalaryma óte kóp materıal jınaldy",- dep jazdy Kozachkov.
Aıta keteıik, ótken senbide jýrnalısti úıqamaqqa aýystyrǵan bolatyn. Kozachkov proestiń barlyq egjeı-tegjeıin jarııalamady, biraq ol ózine taǵylǵan aıyptar tizimi birshama qysqarǵanyn atap ótti.
"Ókinetinimdi jetkizgenime baılanysty zańsyz jarııalaǵan memlekettik qupııalardy ashý isi boıynsha tergeý toqtatyldy. Sondaı-aq, tergeý barysynda óz materıaldaryma aqparat jınap, maqalalar jarııalaý arqyly birneshe ret zańdardy buzǵanym anyqtaldy. Jýrnalıstik tergeýlermen aınalysyp, únemi jańa aqparat izdeı otyryp, basyńdy qaterge tigesiń. Birneshe adamnyń jeke derekterin zańsyz jınap, taratyp jibergenim belgili boldy. Men qateleskenimdi túsinemin, keı kezderi aqıqattan alshaq kettim jáne bul úshin jaýap berýge daıynmyn", – dedi jýrnalıst.
Sonymen qatar, jýrnalıst óz jarııalanymdarynan zardap shekken adamdarǵa, sonyń ishinde Almas, Olga jáne Altaı Ábdiǵapparovtar, Zarına Aqsholakova jáne Ázim Abdýllaevtan keshirim surady.
Eske sala keteıik, Qarjy monıtorıngi agenttigi Mıhaıl Kozachkovty 2022 jyldyń 18 jeltoqsanynda ustady.
Tergeý málimetinshe, Mıhaıl Kozachkov Kospaevtyń uıymdasqan qylmystyq tobyna reıderlik basyp alýlar jasaýǵa kómektesken degen kúdikke ilingen. Qospaev pen onyń sybaılastary tanymal kásipkerlerdiń bıznesin tartyp alýy teris qoǵamdyq rezonans týdyratynyn túsinip, Kozachkovtyń qyzmetterin reıderlik basyp alý qurbandaryna aqparattyq shabýyl jasaý maqsatynda paıdalanǵan.
