Qazaqstannyŋ qoǧam qairatkerı Rauan Şaekin özın Parlamenttık sailauǧa tırkemei otyrǧanyn habarlady. Būl turaly ol Facebook paraqşasyna jariialady, dep habarlaidy “Adyrna” ūlttyq portaly.
Aituynşa, onyŋ üstınen zaŋsyz şeşım şyǧaryp, sailauǧa tırkemei otyr.
“Men, Rauan Şaekin, nege bügınge deiın Qaraǧandy oblysyndaǧy №19 okrugtan deputattyqqa kandidat ekenımdı resmi türde jariialamai otyrmyn. Üş kün boldy jan jaqtan el de, 400 den astam senımdı ökılderım de maza bermei habarlasuda...
Sebebı, oblys bilıgı menıŋ deklarasiiam turaly fiskaldı organdarǧa tapsyrys berıp Temırtau qalasyndaǧy okrugtyq komissiia 2019 jylǧy joldasymnyŋ deklarasiiasynan kınä tauyp, menıŋ syrtymnan, maǧan habarlamai, zaŋsyz şeşım şyǧaryp menı tırkemei otyr. Tırkelmegenımdı ortalyq sailau komissiiasynyŋ tızımı şyqqanda bıraq bıldım! Ekı kün boiy taqqan kınälärınıŋ zaŋsyz ekenın tiıstı organdar arqyly däleldep, moiyndatsam da könbei, jantalasuda. Tıptı tiıstı mekemelerge de qoqan loqy jasauǧa köştı! Söitıp oblys bilıgı menı Parlament sailauyna qatystyrmauǧa baryn saluda! Bügın, iaǧni 21.02. erıksız sotqa jügındım, zaŋsyzdyqtary däleldenedı dep esepteimın, ony maǧan qarsy bilıkte bılıp otyr, olardyŋ oiy menıŋ ügıt nasihatqa bölıngen uaqytymdy ūrlau ǧana.
Bır sözben aitqanda, menıŋ käsıbi zaŋger retınde Parlament Mäjılısıne deputat bolu mümkındıgımnıŋ joǧary ekendıgın bilık öte jaqsy tüsınedı. Endıgı amal qoldarynan kelse jol bermeu. Sailauda taǧy da ūzaq jyldar boiy jalǧasyp kele jatqan las tehnologiia men alaiaqtyq jasaluy äbden mümkın. Olar Prezident Q. Toqaevtyŋ Sailaudy taza jäne ädıl ötkızu turaly tapsyrmalaryn söz jüzınde qoldaǧanmen, ıs jüzınde kerısınşe jūmys jasauda, äkımdıkter bilık qoldap otyrǧan ümıtkerlerıne jappai senımdı ökılder daiyndap, sailauǧa aralaspau turaly Prezident tapsyrmasyn kerek qylmai, äkım orynbasarlaryn özderı taŋdaǧan ümıtkerlerdı ötkızuge jauapty qyp belgılep, täuelsız ümıtkerlerge qarsy jūmys jürgızıp, olardyŋ senımdı ökılderın qorqytyp-ürkıtıp, soŋdaryna aŋduşy qoiyp t.b. zaŋsyz äreketter jasauy qala, oblys, Parlament deputattary sailauyn ötkızu barysynda jappai oryn aluda.
Öitkenı olarǧa el müddesın qorǧauda bilıkke maza bermeitın, öz pıkır-ūstanymy bar, prinsipterıne adal ,täuelsız deputattar kerek emes...”,- dep jazdy ol.
Sondai-aq, ol aldaǧy uaqytta sailaudan jeŋetınıne senımdı ekenın aitty.
“Bilıktıŋ qoldan ūiymdastyryp otyrǧan, äleumettık şielenıs tudyruǧa baǧyttalǧan , jasandy aitys-tartystary nemen aiaqtalady degen oi maza bermeidı... Bır aidan az uaqytta sailau ötedı , ketedı, al ömır jalǧasa beredı.. Bettıŋ aryn belge tüiıp, sailaudan keiın ömır toqtaityndai közderın tūman basqandar, erteŋ eldıŋ aldynda qalai kölgırsidı?! Al halyq bärın bılıp otyr...
Ügıt nasihatqa berılgen bır ai uaqytymnyŋ jartysyn ūrlap, böget jasasa da, qalǧan az uaqytta okrugtegı 6 qala 6 audanda bärıbır kezdesuler ötkızıp, halyqqa bilıktıŋ jasaǧan qiianatyn jetkızıp, qoldaularyna ie bolyp, men özımnıŋ jeŋetınıme senemın!
Al, bilıktegıler maǧan jasap otyrǧan osy qiianattaryna ökınetın bolady, uaqyttyŋ özı töreşı...
Tek qazaq elı osydan paida taba ma, joq pa, mäsele sonda ... Tüsınıstıkpen qabyldaularyŋyzdy ötınemın. Men üşın El müddesı bärınen joǧary, men Halqymmen bırgemın!”, - dep jazdy Rauan Şaekin.
