Osydan týra júz jyl buryn Londonda «PEN» halyqaralyq jazýshylar uıymynyń alǵashqy jıyny ótti. Uıymnyń ataýy aǵylshyn tilindegi «poets» - aqyndar, «essayists» - ocherkshiler jáne «novelists» - jazýshylar degen úsh sózdiń alǵashqy áripterinen quralǵan. Sondaı-aq, Tumandy Albıon halqy «pen» dep qalamdy ataıdy.
Álqıssa, 1986 jyly uıymnyń 48-shi halyqaralyq kongressinde júzden astam memleketten jıylǵan uıym ókilderi 3 naýryzdy «Jazýshylardyń halyqaralyq beıbitshilik kúni» dep jarııalady. Sol sátten bastap bul kún álemniń tukpir-túkpirinde «Jazýshylar kúni» retinde atap ótilýde. Sóz erkindigi úshin kúresip, qoǵamdy jalǵan aqparattan qorǵap júrgen jazýshylar men jýrnalısterdiń múddelerin bir arnaǵa toǵystyrý – bul kásibı merekeniń basty maqsatyna aınaldy.
Qalamgerler meıramy óńirimizdegi aqyn-jazýshylardy da aınalyp ótpedi. Aqmola oblysynyń mádenıet basqarmasy búgin Ádebıet jáne óner mýzeıiniń qabyrǵasynda jergilikti qalamgerlerdiń basyn qosyp, kórkem sóz sheberlerin kásibı merekemen quttyqtady.
«Árbirińizdi óńirimizdiń tanymal, bedeldi azamaty dep bilemiz. Sizderdi osynaý kásibı merekemen shyn júrekten quttyqtaımyz. Aqmola oblysynyń rýhanı ári mádenı damýyna qosyp jatqan úlesterińiz úshin zor alǵys aıtamyz. Barshańyzǵa shyǵarmashylyq tabys, sarqylmas shabyt tileımiz» - dedi basqarma basshysy Aıgúl Sábıtova.
Sonymen qatar, vedomstvo basshysy jıynǵa qatysqan qalamgerlerdi el múddesi úshin birlesip jumys isteýge shaqyrdy. Aqyn-jazýshylar qaýymy tarapynan óńir mádenıetin órkendetýge qatysty birshama usynys aıtyldy, Mádenıet basqarmasynyń taıaý jyldarda jergilikti qalamgerlermen birigip atqaratyn jumystary josparlandy.
