Qaraǧandylyq segız jasar oquşy lapyldaǧan örtten qaryndasyn qalai qūtqaryp qalǧanyn aitty. Päleket kesırınen jüzı men qolyn küiık şalǧan batyr bala bır jyldan keiın ǧana tılge kelıp, ört jaily aita aldy. Jas batyrdyŋ atasy men äjesı örtke oranyp, balanyŋ janynda syz qaldy, dep habarlaidy "Adyrna" ūlttyq portaly.
Qaraǧandyda segız jasar oquşy Nūriden Amantai janyp jatqan üiden ekı jasar qaryndasyn qūtqaryp qaldy. Olardyŋ üiı tolyǧymen otqa oranyp, balalardyŋ atasy men äjesı küiıkten qaitys bolǧan. Nūriden ört auzynan qaryndasyn araşalap qalǧan. Qazır üiı otqa oranǧan Nūridennıŋ otbasy baspanaǧa mūqtaj.
Būl turaly Qaraǧandy oblysy äkımdıgınıŋ baspasöz qyzmetı habarlady.
Ört 2022 jylǧy jeltoqsan aiynda bolǧan. Balanyŋ qoly men betınen küigen. Nūriden ört jaily endı ǧana aita alady.
"Ört üide men qaryndasym, atam jäne äjem bolǧan kezde bastaldy. Peş tūrǧan kıreberıste bırdeŋe jarylyp kettı. Bız ol uaqytta as üide tamaqtanyp otyrǧan edık. Atam men äjem dälızge ne bolǧanyn köru üşın şyǧyp ketıp, ūzaq uaqyt oralmady. Sodan keiın olardyŋ artynan baryp, peştıŋ janynda bärı janyp tūrǧanyn kördım. Dälızden şyǧa almaitynymdy tüsındım. As üige jügırıp baryp, anama qoŋyrau şalyp, qaryndasymdy alyp, ony terezenıŋ aldyna köterdım. Sodan keiın oǧan özım köterılıp, Rabiiamen bırge sekırguge daiyndaldym. Osy kezde körşıler terezege qarai jügırıp keldı. Olarǧa qaryndasymdy berdım de, özım şyqtym", – dedı Nūriden.
Balalardyŋ ata-äjesı syrtqa şyǧa alǧanymen, denelerınıŋ 40-60 paiyzyn küiık şalǧan. Olar Nūridenmen bırge auruhanaǧa jatqyzyldy.
"Men kelgende üi lapyldap janyp jatty. Küieuımnıŋ ata-anasyn jan saqtau bölımıne, Nūridendı qarapaiym palataǧa jatqyzdy. Ökınışke qarai, ekı künnen keiın qaiyn atam qaitys boldy. Taǧy ekı aptadan keiın qaiyn enem qaitys boldy. Qazır bız küieuımızdıŋ tuystarynda ekı bölmelı päterde tūramyz. Olardyŋ bes balasy bar", – deidı Nūridennıŋ anasy Nadira Aqyşova.
Nadiranyŋ jūbaiymen bırge tört balasy bar. Ört kezınde 10 jasar ūly men 13 jasar qyzy olar mektepte bolǧan. Qazır otbasy baspanaǧa mūqtaj.
Juyrda № 36 jalpy bılım beretın mekteptıŋ 3-synybynda oqityn Nūridenge qalalyq bılım bölımınıŋ basşysy Esentai Äşım qonaqqa keldı. Ol oquşyǧa tötenşe jaǧdaida körsetken batyldyǧy men tabandylyǧy üşın alǧysyn bıldırıp, bılım bölımınıŋ qyzmetkerlerı atynan velosiped syilady.
"Adyrna" ūlttyq portaly
Ūqsas jaŋalyqtar
