Búgin 20 myńǵa jýyq partııa múshesi, «Jastar Rýhy» jastar qanatynyń belsendileri men «AMANAT» jaqtastary úgit materıaldaryn jınaýǵa arnalǵan aýqymdy akııaǵa kiristi.
«AMANAT»-tyń Atqarýshy hatshysy Elnur Beısenbaevtyń aıtýynsha, bir aıǵa sozylǵan saılaý naýqanynda barlyq saıası partııa men birmandatty okrýgter boıynsha kandıdattar úgit-nasıhat jumysyn belsendi júrgizip, búkil elimizde birneshe mıllıon plakat japsyrǵan.
«Endi sol japsyrylǵan úgit-nasıhat materıaldarynyń barlyǵyn jınap, tazalaýymyz kerek. Olardy qaıta óńdeýge jiberýge bolady. Bul kommýnaldyq qyzmettiń jumysyn sál de bolsa jeńildetýge septesedi. Mundaı is-sharalar qoǵamǵa qorshaǵan ortany uqypty ustaýdyń qanshalyqty mańyzdy ekenin kórsetip, ekologııalyq mádenıettiń turaqty modelin qalyptastyrýǵa kómektesedi. Osy bastamany partııa Tóraǵasy Erlan Qoshanov jaqynda ótken «Halyqpen birge!» forýmynda aıtqan bolatyn»,-dedi Elnur Beısenbaev.
Aıta keteıik, plakattardy jınaý jumysy elimizdiń barlyq óńirinde júrip jatyr. Bul isten Atyraý qalasyndaǵy partııalyqtary da shet qalmady. Belsendiler bazarlardaǵy, saýda ortalyqtaryndaǵy jáne turǵyn úılerdiń aýlalaryndaǵy úgit-nasıhat plakattaryn jınap jatyr.
«Qaǵaz qaldyqtary búkilálemdik qoqys kóleminde 4-shi orynda tur. Biz plakattardy jınaý jumysyn tek oblys ortalyǵynda ǵana emes, jalpy oblys boıynsha, aýdandarda da júrgizemiz. Olardy makýlatýra qabyldaý pýnktterine tapsyramyz», - dedi «Jastar Rýhy» Atyraý oblystyq fılıalynyń tóraǵasy Abylaı Qurmetuly.
Akııaǵa shymkenttikter de qosyldy. Onda qalalyq saıabaqtar men alańdardaǵy stendterden plakattar alynyp tastalady.
«Úgit-nasıhat barysynda partııa men jastar qanatynyń 580-ge jýyq múshesi 350 myńnan astam materıal taratty. Endi bárimiz solardy jınaýǵa kiristik. Osylaısha, qalamyzda tazalyqtyń saqtalýyna óz úlesimizdi qosamyz»,-deıdi «Jastar Rýhy» JQ-nyń belsendisi Tursynbek Baqytjan.
