Bügın 20 myŋǧa juyq partiia müşesı, «Jastar Ruhy» jastar qanatynyŋ belsendılerı men «AMANAT» jaqtastary ügıt materialdaryn jinauǧa arnalǧan auqymdy aksiiaǧa kırıstı.
«AMANAT»-tyŋ Atqaruşy hatşysy Elnūr Beisenbaevtyŋ aituynşa, bır aiǧa sozylǧan sailau nauqanynda barlyq saiasi partiia men bırmandatty okrugter boiynşa kandidattar ügıt-nasihat jūmysyn belsendı jürgızıp, bükıl elımızde bırneşe million plakat japsyrǧan.
«Endı sol japsyrylǧan ügıt-nasihat materialdarynyŋ barlyǧyn jinap, tazalauymyz kerek. Olardy qaita öŋdeuge jıberuge bolady. Būl kommunaldyq qyzmettıŋ jūmysyn säl de bolsa jeŋıldetuge septesedı. Mūndai ıs-şaralar qoǧamǧa qorşaǧan ortany ūqypty ūstaudyŋ qanşalyqty maŋyzdy ekenın körsetıp, ekologiialyq mädeniettıŋ tūraqty modelın qalyptastyruǧa kömektesedı. Osy bastamany partiia Töraǧasy Erlan Qoşanov jaqynda ötken «Halyqpen bırge!» forumynda aitqan bolatyn»,-dedı Elnūr Beisenbaev.
Aita keteiık, plakattardy jinau jūmysy elımızdıŋ barlyq öŋırınde jürıp jatyr. Būl ısten Atyrau qalasyndaǧy partiialyqtary da şet qalmady. Belsendıler bazarlardaǧy, sauda ortalyqtaryndaǧy jäne tūrǧyn üilerdıŋ aulalaryndaǧy ügıt-nasihat plakattaryn jinap jatyr.
«Qaǧaz qaldyqtary bükılälemdık qoqys kölemınde 4-şı orynda tūr. Bız plakattardy jinau jūmysyn tek oblys ortalyǧynda ǧana emes, jalpy oblys boiynşa, audandarda da jürgızemız. Olardy makulatura qabyldau punktterıne tapsyramyz», - dedı «Jastar Ruhy» Atyrau oblystyq filialynyŋ töraǧasy Abylai Qūrmetūly.
Aksiiaǧa şymkenttıkter de qosyldy. Onda qalalyq saiabaqtar men alaŋdardaǧy stendterden plakattar alynyp tastalady.
«Ügıt-nasihat barysynda partiia men jastar qanatynyŋ 580-ge juyq müşesı 350 myŋnan astam material taratty. Endı bärımız solardy jinauǧa kırıstık. Osylaişa, qalamyzda tazalyqtyŋ saqtaluyna öz ülesımızdı qosamyz»,-deidı «Jastar Ruhy» JQ-nyŋ belsendısı Tūrsynbek Baqytjan.
