SQO-da 250-ge jýyq áskerge shaqyrylýshy Reseıge qashyp ketken. Bul týraly oblystyq qorǵanys isteri jónindegi departament málimdedi, dep habarlaıdy “Adyrna” ulttyq portaly.
Petropavlsk.news-tiń aqparatynsha, SQO ákimdiginde ótken jıynda áskerge shaqyrý naýqanynda kezdesetin negizgi máseleler aıtyldy.
«Demografııalyq úderisterdiń saldarynan SQO-da sońǵy 10 jylda áskerge shaqyrylýshylar sany 38 myń adamnan 16 myńǵa deıin tústi, ıaǵnı 60 % kemidi. Buryn jylyna 1300 jigitti jiberýimiz kerek bolsa, qazir ol 200 adamǵa ǵana qysqardy, 1100 adamdy jasaqtap, attandyrýymyz kerek. Oblys Reseıdiń Qorǵan, Túmen, Omby oblystarymen shektesip jatqandyqtan bul da áser etýde. Áskerge shaqyrý naýqany bastalǵanda jigitterimiz esh qıyndyqsyz shekara asyp ketedi. Qazirgi ýaqytta áskerge shaqyrylýy tıis 250-deı adam osy kórshi memlekette júr», - deıdi oblystyq qorǵanys isteri jónindegi departament bastyǵynyń orynbasary Marat Kárimov.
Kelesi másele – jigitterdiń densaýlyǵyna qatysty. Áskerge shaqyrylýshylardyń tek 15 % ǵana medıınalyq komıssııadan irkilissiz ótedi. 45 % densaýlyǵyna baılanysty túrli shekteýleri bolsa, 40 % beıbit jaǵdaıda áskerı qyzmetke jaramysz.
«Sondaı-aq áskerge shaqyrylýshylardy tirkelgen mekenjaıy boıynsha tappaı jatamyz. Ata-analardyń kópshiligi balalaryn áskerge jibergisi kelmeıdi, sondyqtan onyń júrgen jerin jasyrady, bul da bizdiń jumysymyzdy qıyndatady. Qazirgi ýaqytta SQO boıynsha áskerı esepte turǵan 967 adamnyń júrgen jeri belgisiz», - deıdi Marat Kárimov.
Eske salaıyq, Qazaqstanda 1 naýryzdan bastap merzimdi qyzmetke áskerge shaqyrý bastaldy.12 shildege deıin Qazaqstan Qarýly kushteriniń qatary 18-ben 27 jas aralyǵyndaǵy 18 myńnan astam er-azamat tolyǵýy tıis.
