Qala aýmaǵynda sý basýdyń aldyn alý jumystary josparǵa saı atqarylýda. Shymkent qalasy Tótenshe jaǵdaılar departamenti bastyǵynyń orynbasary, polkovnık Jánibek Kárimbaev Aqparattyq-kommýnıkaııalyq ortalyqta ótken brıfıngte kóktemgi sý tasqyny kezeńinde júıeli is-sharalardyń barysy, sý basýdy boldyrmaý jóninde jumystardy baıandady.
Qazirgi ýaqytta qala aýmaǵynda sý tasqyny kezeńinde jaǵdaı turaqty. Qala aýmaǵynda 10 gıdrotehnıkalyq qurylystyń toǵyzy jaramdy, bir gıdrotehnıkalyq qurylys (Aqjar sý qoımasy) jóndeýdi qajet etedi. Avarııalyq jáne ıesiz gıdrotehnıkalyq qurylys joq. TJ departamenti gıdrotehnıkalyq qurylystar men sý tasqyny qaýpi bar ýchaskelerinde aerovızýaldy tekserý uıymdastyrdy.
–Jalpy sý qoımalarynyń tolýy búginde 60-70 %-dy quraıdy. Qazirgi ýaqytta tasqyn sýlardy qabyldaý úshin sý qoımalarynda qorlar jetkilikti. Badam, Saıram-sý, Qoshqar - ata, Qara-sý ózenderdegi sýdyń deńgeıi ortadan tómen. Sý tasqyny kezeńinde halyqty der kezinde habardar etý, daýyldy eskertýlerdi únemi jarııalap otyrmyz. Kazgıdromettiń málimeti boıynsha naýryz aıynda jańbyr normadan kóp kútiledi degen boljam bar. Bul degenimiz osy mezgilde sý basý jaǵdaılary kúrdelenýi múmkin. Jalpy departament qyzmetkerleri jaǵdaıdy nazarda ustap otyr, - dedi Jánibek Turlybekuly.
Qala aýmaǵyndaǵy sý basý qaýipti aımaqtarǵa tikushaq arqyly áýeden sholý jumystary jáne aýdandyq ákimdikterimen birlesip qaýipti sý basý yqtımal ýchaskilerge monıtorıng júrgizilgen. Nátıjesinde qalada uzyndyǵy 56 shaqyrym 12 kanal qoqystan tazalanǵan.
