Memlekettık qyzmetke qabyldau kezınde ötkızıletın testıleude qazaq tılı esepke alynatyn norma engızu qajet. Būl turaly Mäjılıstıŋ jalpy otyrysynda deputat Samat Mūsabaev aitty, dep habarlaidy "Adyrna" ūlttyq portaly.
«Bügıngı özektı mäsele, ol – memlekettık qyzmet salasyndaǧy qazaq tılınıŋ jaǧdaiy. Zaŋmen bekıtılgen biık märtebesıne qaramastan, bügıngı künge deiın memlekettık qyzmet salasynda ana tılımızdıŋ resmi tıldıŋ tasasynda qalyp otyrǧany jasyryn emes. Qazaqstan Respublikasy Memlekettık qyzmet ısterı jäne sybailas jemqorlyqqa qarsy ıs-qimyl agenttıgı töraǧasynyŋ 2017 jylǧy 21 aqpandaǧy №40 būiryǧyna säikes, memlekettık äkımşılık lauazymyna ornalasuǧa arnalǧan konkursty ötkızu qaǧidasynda «Qazaqstan Respublikasynyŋ memlekettık tılın bıluge arnalǧan testıleuden ötu üşın - män belgılenbeidı» dep jazylǧan. Demek būl, memlekettık qyzmetke ötu barysyndaǧy tapsyrylatyn testıleude qazaq tılınıŋ qajettılıgı joq ekenın bıldıredı», - dedı Memlekettık qyzmet ısterı agenttıgı töraǧasynyŋ atyna deputattyq saual joldaǧan Samat Mūsabaev.Mysaly onyŋ deregınşe, «B» korpusynyŋ memlekettık qyzmetke ötu synaǧynda 9 normativtık-qūqyqtyq aktıler boiynşa qamtylǧan 130 sūraqtyŋ belgılı bır mejesı körsetılgen. Al qazaq tılınen ötu mejesı aiqyndalmaǧan. Būl ana tılge degen qūrmettıŋ müldem joqtyǧyn körsetedı.
«Bızge tüsınıksızdıgı, memlekettık qyzmetke ötken azamattarǧa berıletın sertifikatta «Ümıtker Qazaqstan Respublikasynyŋ memlekettık tılı men zaŋnamalaryn bıluge arnalǧan testıleuden sättı öttı» dep jazylady. Būl anyq köz boiaşylyq emes pe? Osyǧan orai bızdıŋ ūsynysymyz memlekettık qyzmetke qabyldau kezınde ötkızıletın testıleu kezınde qazaq tılı esepke alynyp, ümıtker 100 paiyz memlekettık tılden oŋ nätije şyǧaru kerek degen normalar engızılsın», - dedı Mäjılıs deputaty.
