«Samūryq-Qazyna» tabysynyŋ kem degende 7 paiyzy «Qazaqstan Halqyna» qoryna audarylady

«Samūryq-Qazyna» ūlttyq äl-auqat qory jyl saiyn «Qazaqstan halqyna» qoǧamdyq qoryna taza tabysynyŋ kemınde 7%-yn audaryp otyratyn bolady. Qarajatty bölu tärtıbın retteitın erejeler Ükımet qaulysymen bekıtıldı, dep habarlaidy «Adyrna» tılşısı. Qaulyǧa säikes, «Qazaqstan halqyna» qory audarylǧan qarajatty belgılengen maqsatqa baǧyttauǧa tiıs. Bügınde qor alty baǧyt boiynşa 25-ten astam qaiyrymdylyq baǧdarlamasyn jüzege asyrady, olardyŋ ışınde medisina, bılım beru, sport, mädeniet, äleumettık qoldau, sondai-aq tötenşe jaǧdailar kezınde kömek körsetu salalary bar. Atap aitqanda, nauqastardy därı-därmekpen, jastar men mügedektıgı bar balalardy innovasiialyq protezdık-ortopediialyq būiymdarmen qamtamasyz etu, auylda negızgı mektepter, erte aralasu ortalyqtary, autizmmen auyratyn balalarǧa arnalǧan ortalyqtardy qūru, medisinalyq ūiymdardy zamanaui qūraldarmen jabdyqtau, auyl mektepterınıŋ tülekterıne jäne halyqtyŋ äleumettık osal toptaryna kıretın oquşylarǧa bılım granttaryn ūsynu baǧdarlamalary bar. Eske sala keteiık, jyl saiyn «Samūryq-Qazyna» qorynyŋ taza tabysynyŋ kem degende 7%-yn «Qazaqstan halqyna» qoǧamdyq qoryna audaru turaly bastamany Memleket basşysy «Ädılettı memleket. Bırtūtas ūlt. Berekelı qoǧam» atty halyqqa Joldauynda aitqan bolatyn.