Aqtöbe oblysynda jetım balalardan negızsız tabys tapqany üşın bılım bölımınıŋ basşysy sottaldy. Būl turaly Alǧa audandyq sotynyŋ baspasöz qyzmetı jariialady, dep habarlaidy “Adyrna” ūlttyq portaly.
«Alǧa audandyq soty qyzmettık ökılettıkterın asyra paidalandy (361-baptyŋ 4-bölıgı, 3-tarmaǧy), qyzmettık ötırık aqparat beru (369-baptyŋ 1-bölıgı) jäne käsıpkerlık qyzmetke zaŋsyz qatysu (364-bap) aiyptary boiynşa azamatşa U.-ǧa qatysty qylmystyq ıstı qarady» delıngen habarlamada.Tergeu barysynda anyqtalǧandai, audandyq bılım bölımınıŋ būrynǧy basşysy materialdyq paida köru maqsatynda oqu ortalyǧyn qūrǧan. Odan keiın bılım bölımı men jeke käsıpker arasynda balalarǧa qosymşa bılım beru qyzmetterın körsetuge kelısım-şart jasap, 1,2 million teŋge alǧan.
«Jazǧy kezeŋnıŋ soŋyna qarai bılım bölımı 300 jetım balaǧa 12 küntızbelık künge jazǧy demalys lagerıne joldama aluǧa bölıngen 18,8 mln teŋge kölemındegı biudjet qarajatyn igerıp ülgermeuı mümkın ekenın tüsınıp, ata-anasynyŋ qamqorlyǧynsyz qalǧan, az qamtylǧan jäne köp balaly otbasylardan şyqqan, mügedek balalarǧa jauapker memlekettık satyp alu turaly şeşım qabyldaidy. Nätijesınde keibır şarttar özgertılıp, lagerge 203 bala jıberıldı, onyŋ ışınde 160 bala joǧaryda atalǧan sanatqa jatpaidy, belgılengen 12 künnıŋ ornyna 7 küntızbelık kün bolǧan. Demalys aiaqtalǧannan keiın sottaluşy qyzmettık alaiaqtyq jasauǧa kırısıp, resmi qarjylyq qūjattarǧa 12 kün ışınde 300 joldama qabyldaǧany turaly körıneu jalǧan aqparat engızgen», – dedı sot.Jalpy, jauapker JŞS şotyna 10,3 mln teŋge audarǧan.
«Prokuror prosessualdyq kelısımde sottaluşyǧa jyl saiyn 100 saǧat mäjbürlı jūmysqa tartumen 3 jyl 6 ai merzımge bas bostandyǧyn şekteu türındegı qylmystyq qūqyq būzuşylyqtardyŋ jiyntyǧy boiynşa tüpkılıktı jaza taǧaiyndaudy sūrady. Sondai-aq, memlekettık qyzmettegı lauazymdardy atqaruǧa ömır boiyna tyiym salu türındegı qosymşa jaza taǧaiyndalsyn», – dedı sot.Sot Aqtöbe oblysynyŋ bılım basqarmasynyŋ basşylyǧyna qatysty jeke ūiǧarym şyǧardy. Äiel kınäsın moiyndap, şyǧyndy öz erkımen töledı.
