QR Premer-Ministrınıŋ orynbasary Altai Kölgınov jäne «AMANAT» partiiasynyŋ Hatşysy Eldar Jūmaǧaziev Atyrau oblysyndaǧy Mahambet audanynyŋ tūrǧyndarymen kezdestı, dep habarlaidy «AMANAT» partiiasynyŋ baspasöz qyzmetı.
Prezident Qasym-Jomart Toqaev «Ädılettı Qazaqstan: bärımız jäne ärqaisymyz üşın. Qazır jäne ärdaiym» dep atalatyn sailaualdy baǧdarlamasynda auyl tūrǧyndarynyŋ ömır sapasyn jaqsartuǧa basymdyq bergen edı.
Aldaǧy jetı jylda auyl tūrǧyndarynyŋ tabysyn arttyru üşın 1 trln. teŋge bölu közdelgen. Būl qarajat auyl şaruaşylyǧy salasynda 350 myŋnan astam sapaly jūmys ornyn aşuǧa mümkındık beredı. QR Parlamentınıŋ VIII şaqyrylymdaǧy alǧaşqy sessiiasynyŋ aşyluynda Memleket basşysy auyl tūrǧyndaryna 5-7 jylǧa jyldyq ösımı 2,5 paiyz bolatyn şaǧyn nesie berıletının mälımdedı. «AMANAT» partiiasy atalǧan jobany Ükımetpen bırlesıp jüzege asyruda.
«AMANAT»-tyŋ Hatşysy Eldar Jūmaǧazievtıŋ aituynşa, joba aiasynda şarualar öŋırlık äleumettık-käsıpkerlık korporasiiasy arqyly nesie räsımdei alady; lizingke auyl şaruaşylyǧy tehnikasyn ala alady, al tehnika qūnynyŋ 50%-yn memleket subsidiialaidy; servistık-ötkızu kooperativterın qūra alady jäne taǧy basqa.
Aita keteiık, byltyr 40 kündık auqymdy aqparattyq marafon ūiymdastyryldy. «AMANAT»-tyŋ trenerlerı mobildı toptar qūramynda 28 şılde men 10 qyrküiek aralyǧynda elımızdegı 179 audannyŋ 425 auyly men auyldyq okrugınde 250 myŋ azamatty qamti otyryp, kezdesu ötkızdı. Al partiianyŋ Saiasi menedjment akademiiasy auyl, auyldyq okrug äkımderı jäne «AMANAT»-tyŋ aumaqtyq filialdarynyŋ atqaruşy hatşylary üşın halyqtyŋ ekonomikalyq belsendılıgın arttyru salasyndaǧy qūzyretterdı damytu boiynşa erekşe kurstar ötkızdı. Oǧan 2346 adam qatysty.




«AMANAT» partiiasy auyldyŋ äl-auqatyn jaqsartu, auyl şaruaşylyǧyn qoldau – memlekettıŋ strategiialyq mındetterınıŋ bırı ekenıne senımdı. Jeke qosalqy jäne şarua qojalyqtary, fermalar, auyl şaruaşylyǧy önımderın qaita öŋdeu käsıporyndary ärdaiym tüsınıktı jäne tūraqty erejeler boiynşa qoldauǧa ie boluy tiıs. Sondyqtan bız Ükımet müşelerımen bırlesıp «Auyl amanaty» jobasy aiasynda Prezident tapsyrmalaryn oryndau maqsatynda jergılıktı jerlerde qabyldanatyn şaralarmen tanysyp jatyrmyz. Būl joba auyl tūrǧyndaryna öz ısın aşuǧa mümkındık bere otyryp, halyqtyŋ tabysyn arttyruǧa yqpal etedı. Partiia tarapynan aqparattyq-tüsındıru jūmysyn jürgızıp, jobaǧa qatysuşylardy oqytamyz», - dedı Eldar Jūmaǧaziev.Al Premer-Ministrdıŋ orynbasary Altai Kölgınov Mahambet audanynyŋ tūrǧyndarymen kezdesu kezınde «Auyl amanaty» jobasy auyldaǧy jūmyspen qamtu mäselesın şeşuge septıgın tigızetının jetkızdı.
«Köktem – bastamany öz qolyŋyzǧa alu, öz biznesıŋızdı bastau uaqyty. Onyŋ üstıne memleket jeke qosalqy şaruaşylyqty nemese käsıpkerlıktı damytu üşın jeŋıldetılgen paiyzdyq mölşerlememen qolaily jaǧdailar, nesielık demalystar jäne basqa da mümkındıkter beredı. Oblys äkımdıgınıŋ tapsyrysyna säikes «Auyl amanaty» baǧdarlamasyn jüzege asyru üşın Atyrau oblysyna 1 mlrd 504 mln teŋge bölındı. Būl qarajatqa 188 nesie berıp, 200-ge juyq jeke qosalqy şaruaşylyq qūru josparlanuda», - dedı Premer-Ministrdıŋ orynbasary.Öz kezegınde, kezdesuge qatysqan şarua qojalyǧynyŋ basşysy Asqar Tasqaliev daiyn önımdı halyqqa qoljetımdı baǧamen jetkızu üşın memleket qoldauy qajet ekenın atap öttı. «Önım ötkızuge qatysty bırqatar mäsele bar. Sebebı janarmai, tyŋaitqyş, jūmysşylarǧa tölenetın jalaqy qūny ösıp jatyr. Alaida barlyq şyǧyndy tüpkı önım qūnyna qosatyn bolsaq, şarualar tūtynuşysyz qalady», – dedı ol.

