Jeńis kúni qarsańynda soǵys ardagerlerine 4,6 mlrd teńge somasyna birjolǵy materıaldyq kómek kórsetiledi. Bul týraly Eńbek jáne halyqty áleýmettik qorǵaý mınıstrligi málimdedi, dep habarlaıdy «Adyrna» tilshisi.
Basqarma jyl saıyn birjolǵy materıaldyq kómek tóleýdiń dástúrge aınalǵanyn atap ótti.
«Jeńis kúni qarsańynda jergilikti atqarýshy organdar 4,6 mlrd teńge somasynda birjolǵy kómek kórsetýdi kózdep otyr. Oblystardyń, elorda men respýblıkalyq mańyzy bar qalalardyń ákimdikterine UOS qatysýshylary men UOS kezeńinde jaralanýy, kontýzııa alýy, mertigýi nemese aýrýǵa shaldyǵýy saldarynan bolǵan múgedektigi bar adamdar úshin materıaldyq kómektiń eń tómengi kepildendirilgen shegin 1,5 mln teńgeden kem emes mólsherinde belgileý usynyldy. Nátıjesinde barlyq óńirde olar úshin atalǵan mólsherde birjolǵy materıaldyq kómek kózdelip otyr (Aqtóbe jáne Pavlodar oblystarynda – 2 mln teńge)»,—delingen habarlamada.
Aıta keteıik, qazirgi tańda elimizde Uly Otan soǵysynyń 222 qatysýshysy jáne UOS kezeńinde alǵan jaralanýy, kontýzııa alýy, mertigýi nemese aýrýy saldarynan múgedektigi bar adamdar, sondaı-aq UOS jeńisine úles qosqan 60 106 basqa da azamat turady.
2023 jylǵy 1 mamyrdaǵy jaǵdaı boıynsha zeınetaqyny eskere otyryp aı saıyn alynatyn áleýmettik tólemderdiń ortasha jıyntyq mólsheri:
UOS qatysýshylary úshin – 220 754 teńge (161 adam);
UOS kezeńinde jaraqat alý, kontýzııa alý, mertigý nemese aýrý saldarynan múgedektigi bar adamdar úshin – 229 286 teńge (61 adam);
basqa memleketterdiń (Aýǵanstan, Vetnam, Aljır, Mysyr, Irak jáne t. b.) aýmaǵyndaǵy áskerı is-qımyldarynyń ardagerleri úshin – 215 201 teńge (25 752 adam);
jeńildikter boıynsha UOS qatysýshylaryna teńestirilgen adamdar úshin – 182 782 teńge (3 648 adam);
UOS kezeńinde jaraqat alý, kontýzııa alý, mertigý nemese aýrý saldarynan múgedektigi bar adamdarǵa jeńildikter boıynsha teńestirilgen adamdar úshin – 140 838 teńge (14 424 adam);
UOS jyldaryndaǵy tyl eńbekkerleri úshin – 148 892 teńge (57 436 adam).
