Äleumettık jelıde Memleket basşysy Qasym-Jomart Toqaevtyŋ Mäskeuge sapary qyzu talqylaǧan bolatyn. Azamattardyŋ bır bölıgı «Prezidenttıŋ sapary mäjbürlı qadam» dep aqtasa, ekınşı top «Basqynşy eldıŋ prezidentı Putinnıŋ qoldau qatelık boldy» dep aiyptaǧan.
Bügın jurnalister Mäjılıs töraǧasy Erlan Qoşanovtyŋ osy mäselege qatysty pıkırın bıldı.
«PREZİDENT – QAZAQ JAUYNGERINIŊ JOQTAUŞYSY»
- Men būl sapardy öte dūrys sapar dep esepteimın. Sebebı Ūly otan soǧysy – bızdıŋ ortaq tarihymyz. Ūly jeŋıs ol da bızdıŋ ortaq tarihymyz. Sondyqtan sol bauyrlas memleketterdıŋ basşylarynyŋ barlyǧy derlık keşegı paradta boldy. Būl bızdıŋ soǧysta şeit bolǧan ata-babalarymyzǧa arnalǧan qūrmet dep oilaimyn. Būl jerde būl mäselenı saiasilandyrudyŋ qajetı joq. Būl bır. Ekınşıden, bızdıŋ Qazaqstannyŋ özınen 1 mln 200 myŋǧa juyq adam soǧysqa kettı. Sol soǧystan bızdıŋ äke, atalarymyzdyŋ jartysy oralmady. Olardyŋ köbısı Resei jerınde jatyr. Jauyngerlerdıŋ ızdeuşısı, joqtauşysy boluy kerek pe, bolmauy kerek pe? Izdeuşısı, joqtauşysy kım boluy kerek? Menıŋ oiymşa, qazaq halqy men prezidentımız boluy kerek. Prezidenttıŋ saparyn zerdelep saralaityn bolsaŋyz, bırınşı kezekte prezident Astanadaǧy «Otan qorǧauşylar» memorialyna gül şoǧyn qoiyp, elımızdegı Otan qorǧauşylarǧa taǧzym ettı, - deidı Mäjılıs töraǧasy.
Onyŋ aituynşa, el basşysy jergılıktı ardagerlerge «Halyq qaharmany» ataǧyn bergennen keiın Rjev qalasyna bardy. Rjev qalasyndaǧy 22 myŋ qazaqstandyqtyŋ denı qazaq jauyngerlerı boldy. Olar Mäskeudı qorǧaǧan kezde qaza tabady. Solardyŋ är bırınıŋ aty-jönı tasqa qaşalyp jazylǧan.
- Prezident ziiarat jasap, özımızdıŋ dästür boiynşa Qūran oqydy. Prezident solardyŋ joqtauşysy bolyp bardy dep oilaimyn. Sol jerde prezidentımızdıŋ äkesınıŋ tuǧan aǧasy Qasym Boltaev jatyr. Men būl saparda prezident özınıŋ azamattyq, perzenttık jäne prezidenttık boryşyn atqaryp keldı dep esepteimın, - dedı Erlan Qoşanov.
Äu basta prezidenttıŋ baspasöz qyzmetı Qasym-Jomart Toqaevtyŋ 9 mamyr künı Astanada bolatynyn habarlaǧan bolatyn. Osyny eske alǧan jurnalister «Prezident aiaq astynan Mäskeuge nege saparlady?» dep sūrady. Spiker Qasym-Jomart Toqaevtyŋ jūmys kestesın özı emes, prezident äkımşılıgı jasaitynyn aityp, qūtyldy.
ÄZIRGE QYZYL TUǦA QARSY QŪZYR JOQ...
9 mamyr künı elımızdıŋ bırneşe qalasynda Sovet ükımetınıŋ qyzyl tuyn ūstap, jüzdegen adam äskeri atributtarmen marş ötkızgen bolatyn. Işkı ıster ministrı Marat Ahmetjanovtan «Qūzyrly organ ökılderı qyzyl tu ūstaǧandarǧa nege jaza qoldanbady?» dep sūradyq.
- Bügıngı taŋda olarǧa eskertu, tüsındıru jūmystary jürgızıldı. Qūqyqtyq memlekette tūrǧandyqtan, zaŋda şekteu bolmaǧan soŋ oǧan (KSRO tuyn alyp şyǧuǧa – S.J.) rūqsat. Alaida bız aşyq qoǧamda tūramyz. Eger olardyŋ äreketı qoǧamnyŋ narazylyǧyn tudyrǧandyqtan, ışkı ıster organdarynyŋ saqşylary nasihattau, ügıtteu, eskertu jūmystaryn jürgızdı, - deidı Işkı ıster ministrı Marat Ahmetjanov.
Ministrdıŋ özı ūlttyq maqtanyşty qorlau sezımın tudyratyn osy mäselenı zaŋmen retteu kerek dep esepteidı.
- Eger zaŋda şekteu bolmasa onda rūqsat berılgen. Mūndai mäsele bolatyn bolsa, deputatttar ūsynys jasap, qabyldaidy. Eger zaŋmen şekteu bolyp, ol zaŋsyz bolatyn bolsa bız tiıstı ıs äreketterdı zaŋ şeŋberınde qoldanamyz, - dep jauap ministr Ahmetjanov.
Osy aitylǧan mäsele boiynşa Mäjılıs töraǧasy Erlan Qoşanovtyŋ özıne sūraq qoidyq.
- Qajettılık bolatyn bolsa, bız ondai zaŋ qabyldaimyz. Bügınde zaŋda ondai şekteu joq, - dep qysqa-nūsqa jauap berdı...
Al älemde Baltyq jaǧalauy elderı sekıldı sovettık simvolikaǧa tyiym salǧandar bar.
Serık Joldasbai
