Búgin oblys ákimi Nurlybek Nálibaev Aqsýat aýyldyq okrýgine kógildir otyn qosý rásimine qatysyp, aýyl turǵyndaryn quttyqtady.
«Memleket basshysy Qasym-Jomart Kemeluly: «Asa mańyzdy máselelerdiń biri – aýyldy keshendi túrde damytý. Aýyldarǵa naqty qoldaý kórsetip, zamanaýı ınfraqurylymdy damytýymyz kerek» degen bolatyn. Ótken jyly 14 gazdandyrý jobasyn júzege asyrýǵa 8,7 mlrd.teńge bólinip, nátıjesinde 6 aýyldy gazǵa qostyq. Osylaısha óńirdiń gazdandyrý deńgeıi 70 paıyzǵa jetti. Bıylǵa respýblıkalyq bıýdjetten 7,4 mlrd. teńge bólinip, 2022 jyly bastalǵan 7 joba jalǵastyrylady. Oǵan qosa 12 jańa jobanyń qurylysy bastalady. Onyń ishinde, Qosshyńyraý aýyldyq okrýginiń Abaı, Dosan eldi mekenderine de gaz jetkizý jobalary bar. Demeýshilerdiń qarjy kózderinen 100 mln. teńgege Sabalaq saıajaıyna tabıǵı gaz jelisin tartýdyń joba-smetalyq qujattary ázirlenýde», - dedi aımaq basshysy.
Aýyl turǵyndaryn qoǵam qaıratkeri Aıtbaı Kósherbaev pen aýyl aqsaqaly, qoǵamdyq keńestiń tóraǵasy Ómirserik Ábýov quttyqtady.
Is-shara qonaqtary zeınetker Seıitqasym Táýirbaevtyń úıine tabıǵı gaz qosý sátine kýá boldy.
Ári qaraı oblys ákimi Aqsýat aýyldyq okrýginiń turǵyndarymen kezdesip, suraqtaryna jaýap berdi.
Aıta keteıik, osy aýyldyq okrýgti gazdandyrýǵa respýblıkalyq jáne jergilikti bıýdjetten 4,9 mlrd.teńge bólindi, merdiger mekeme - «Alııa Servıs» JShS.
Búginde Aqsýattyń ınfraqurylymyn damytý úshin «Aýyl – el besigi» jobasy aıasynda birqatar jumystar atqarylýda. Atap aıtqanda, qazir 79,9 mln. teńgege 3 kóshege ortasha jol jóndeý jumystary júrgizilýde. Budan bólek, 5 kóshege ortasha jol jóndeý jumystaryn júrgizý úshin Ulttyq qordan 350,9 mln. teńge qaralyp otyr. Sondaı-aq, jańadan qonystanýshylar turatyn 32 kóshege elektr jelilerin júrgizý úshin joba- smetalyq qujattar ázirlenip, 1 mlrd. teńge bólý jóninde respýblıkalyq bıýdjetke ótinim usynyldy. Aımaq basshysy «Báıterek» turǵyn aýdanyndaǵy sý jınaǵysh qurylǵynyń jumysymen tanysty. Nysan qurylysy 2022 jyldyń tamyz aıynda bastalyp, bıyl sáýir aıynda aıaqtaldy. Munda tereńdigi 440 m 7 uńǵyma men 3 rezervýar bar. Qurylǵynyń qýattylyǵy 7200 m3. Odan keıin oblys ákimi shaǵyn aýdan turǵyndarymen kezdesti.
