Búgin Almatyda «Jastar Rýhy» Jastar qanatynyń uıymdastyrýymen «AMANAT CUP» XXI Respýblıkalyq pikirsaıys týrnıri bastaldy. Is-sharanyń ashylý saltanatyna «AMANAT» partııasynyń Hatshysy Dáýlet Káribek, «Jastar Rýhy» JQ tóraǵasy Nurjan Jetpisbaev, «Turan» ýnıversıtetiniń rektory, Joǵary oqý oryndary qaýymdastyǵynyń prezıdenti Rahman Alshanov, partııanyń Almaty qalalyq fılıalynyń tóraǵasy Stanıslav Kankýrov, qalalyq máslıhat depýtattary jáne jastar uıymdarynyń ókilderi qatysty.
Óz kezeginde, Dáýlet Káribek pikirsaıys synı oılaýdy damytyp qana qoımaı, adamnyń oı-órisi men erýdıııasyn keńeıtýge yqpal etetinin atap ótti.
«Barlyq komanda aımaqtarda irikteýden ótip, munda eń myqty, eń laıyqty sóz sheberleri jınaldy. Kóp adam pikirsaıys ne úshin kerek dep suraıdy. Pikirsaıys adamnyń óz oıyn durys tujyrymdaýǵa, óz pikirin qalyptastyrýǵa jáne ony aýdıtorııaǵa jetkizýge úıretedi. Bul ásirese óz ómirin saıası nemese qoǵamdyq qyzmetpen baılanystyrǵysy keletinder úshin qajet», - dedi partııa Hatshysy.
Eki kúnge sozylatyn týrnırge Qazaqstannyń barlyq aımaǵynan 60 komanda qatysady. Pikirsaıys Almatydaǵy Turan ýnıversıtetinde ótýde. Týrnır irikteý kezeńi men pleı-off, qazaqstandyq jáne reseılik stýdentter lıgasynan turady. «Jastar Rýhy» uıymynyń tóraǵasy Nurjan Jetpisbaevtyń aıtýynsha, jyl sanap úzdik pikirsaıysshy ataǵyn ıelenýge nıet bildirýshiler qatary artyp keledi.
«10 jyldan astam ýaqyttan beri sóz qadirin biletin áýesqoılar bizdiń alańda kezdesip júr. «AMANAT CUP» jastardyń azamattyq sana-sezimin, sondaı-aq jalpy pikirsaıys qozǵalysyn damytýǵa yqpal etedi. Osy týrnırge 150-ge jýyq komanda ótinim berdi. Alaıda solardyń tek 60-y ǵana qatysyp jatyr. Bıyl biz talqylanatyn máseleler tizimine býkmekerlik keńselerdiń zııany, qazaqstandyq ǵylymdy damytý máselesi, áleýmettik jelilerdiń mańyzdylyǵy týraly birqatar taqyrypty qosýdy jón kórdik. Kelesi jyly oıyn jeńimpaz komandanyń aımaǵynda ótedi», - dedi ol.
Aıta keteıik, ekinshi jyl qatarynan ótkizilip jatqan debat týrnıri Islam yntymaqtastyǵy uıymy Jastar forýmynyń Eýrazııalyq óńirlik ortalyǵynyń qoldaýymen júzege asyrylyp jatyr. Jeńimpazdar men júldegerlerdiń esimi erteń belgili bolady.
