Qasym-Jomart Toqaev pen Sı zınpın kelissóz júrgizdi, dep habarlaıdy «Adyrna» tilshisi.
«Qazaqstan úshin Qytaı Halyq Respýblıkasynyń orny – erekshe. Bizdiń yntymaqtastyǵymyz myzǵymas dostyqqa jáne ózara qoldaýǵa negizdelgen. Ekijaqty qarym-qatynasty jandandyrý jolyndaǵy maqsatymyz – ortaq. Aımaqtyq jáne halyqaralyq qaýipsizdikti, ózara yqpaldastyqty nyǵaıtýdy kózdeıtin muratymyz da – bir. Biz úshin Qytaımen máńgilik ári jan-jaqty strategııalyq áriptestikti odan ári damytý óte mańyzdy», – dedi ol.
Prezıdenttiń aıtýynsha, Qytaı — Qazaqstannyń negizgi saýda seriktesteriniń biri.
«Ótken jyldyń qorytyndysy boıynsha ózara saýda-sattyq kólemi 30 jyldyń ishindegi rekordtyq deńgeıge jetip, 31 mlrd dollardan asty. Mundaı qarqynmen biz jaqyn arada taýar aınalymy kórsetkishin 35 mlrd dollarǵa deıin jetkizý maqsatyna qol jetkize alamyz dep oılaımyn. Sondyqtan 2030 jylǵa qaraı 40 mlrd dollarlyq mejeni belgileýdi usynamyn. Osy maqsatqa jetý úshin biz ózara saýda nomenklatýrasyn keńeıte alar edik»,—dep pikir bildirdi Toqaev.
QHR Tóraǵasy Sı zınpın Qasym-Jomart Kemelulyna qonaqjaılyq iltıpat bildirip, 70 jastyq mereıtoıymen quttyqtady.
«Osyndaı aıtýly kúni Siz Qytaıǵa memlekettik saparmen kelip otyrsyz. Bul bizdiń ekijaqty yntymaqtastyǵymyzdyń joǵary deńgeıde ekenin kórsetedi jáne Qytaımen tyǵyz baılanystaryńyzdy taǵy da rastaıdy. Qytaı men Qazaqstan qytaı-qazaq qatynastarynyń jańa «altyn 30 jyldyǵyna» qadam basty. Bizdiń elderimiz dostyq, ózara qoldaý dástúrin damytyp, tıimdi yntymaqtastyqty tereńdetýi qajet», – dedi QHR Tóraǵasy.
Kezdesý barysynda taraptar eki eldiń saýda-ekonomıka, munaı-gaz, munaı hımııasy, energetıka, bilim jáne ǵylym, qarjy salalaryndaǵy jan-jaqty yntymaqtastyǵyn damytý, kólik-tranzıt áleýetin arttyrý máselelerin talqylady. Sondaı-aq olar halyqaralyq jáne óńirlik kún tártibindegi máseleler jóninde pikir almasty.
