Qazaqstan ädılet ministrı Marat Beketaev "bilık qysym jasady" dep Astanany sotqa bergen moldovalyq biznesmen Anatol Statidıŋ şaǧymy boiynşa sottyŋ älı ötıp jatqanyn, "prosess bır jarym jylǧa sozyluy mümkın" ekenın aitty.
Ministrdıŋ sözınşe, äuelde būǧattalǧan Ūlttyq qordyŋ 22 mlrd dollar qarjysynyŋ 21,5 mlrd dollary qazır "qorǧa qaitarylǧan".
- Eşqandai qauıp joq. 21,5 mlrd dollar basqa bankke auystyryldy. Ol qarjy basqa baǧaly qaǧazdarǧa investisiialanyp, odan Qazaqstanǧa paida keledı. Al 500 million dollar älı Londondaǧy New York Mellon bankınde jatyr. Būl - az [aqşa] emes. Bıraq oǧan da eşqandai qauıp joq. Qazır London sotynda būl mäsele qaralyp jatyr. Prosess älı bıraz uaqyt alady, - dedı ol.
Jurnalister Beketaevtan İtaliia soty nauryzdyŋ basynda şyǧarǧan şeşım turaly sūraǧan. Şeşım boiynşa, Qazaqstan moldavalyq käsıpkerler - Anatol men Gabriel Statige 500 million dollardan asa ötemaqy töleuge mındettelgen. Būǧan qosa, Rim sotynyŋ şeşımımen Astana Statige 120 myŋ euro (şamamen 136 myŋ dollar) sot şyǧynyn ötep beruı kerek bolǧan.
Beketaev "İtaliia soty Qazaqstanǧa jürmeidı" deidı.
- İtaliia sotynyŋ qūzyretı tek İtaliiada [bar]. Onda bızdıŋ eşbır aktivımız joq. Tek elşılık ǧimaraty bar. Statidıŋ nege İtaliia sotyna jügıngenı bızge de tüsınıksız. Mümkın tek qana osyndai sot şeşımın aluǧa [bardy], - dedı ministr.
Ekı jyl būryn - 2017 jyly jeltoqsanda New York Mellon bankı moldovalyq biznesmen Anatol Statidıŋ Qazaqstan ükımetıne qarsy aryzy boiynşa Qazaqstan Ūlttyq qorynyŋ 22 milliard dollar qarjysyn būǧattaǧan. Byltyr tamyzda Angliia soty biznesmen Statidıŋ sot şeşımın oryndatu jönınde tüsırgen şaǧymy boiynşa ötken sot prosesınde Qazaqstannyŋ paidasyna qarai şeşım şyǧarǧan.
Qazaqstannyŋ mūnai-gaz salasyna investisiia salǧan Stati memlekettık organdar özın "investisiiasyn tym arzanǧa satuǧa mäjbürleu üşın qyspaqqa alǧanyn" aitady. Astana būl aiyptaudy terıstep, Statidı "alaiaqtyq jasady" dep aiyptaidy.
"Azattyq" radiosy
