Şanhai yntymaqtastyq ūiymyna qatysuşy elderdıŋ ministrlerı 2023-2024 jyldarǧa ūiymnyŋ mädeni jäne turistık astanasy retınde Almaty qalasyn bekıtu turaly ūsynysty qoldady, dep habarlaidy QR Mädeniet jäne sport ministrlıgı.
Ashat Oralov Şanhai yntymaqtastyq ūiymyna qatysuşy elderdıŋ mädeniet ministrlerınıŋ keŋesıne qatysty. Onlain-kezdesuge Ündıstan, QHR, Qyrǧyzstan, Özbekstan, Täjıkstan, Resei jäne Päkıstan ökılderı de qatysty.
Ministr Almaty qalasyna ŞYŪ-nyŋ 2023-2024 jyldarǧa mädeni jäne turistık astanasy märtebesın beru turaly mäselenı köterdı.
«Men Kein myrzaǧa jäne barlyq qatysuşylarǧa bızdıŋ bastamamyzdy qoldaǧany üşın alǧys aitamyn. Bügıngı taŋda bız Almaty qalasynda 14 ıs-şarany közdeitın jospar äzırledık. Būl halyqaralyq turistık jäne mädeni festivaldar, sondai-aq marafondar. Qazaqstannyŋ ŞYŪ-na töraǧalyǧy da auqymdy mädeni baǧdarlamamen süiemeldenetın bolady. ŞYŪ elderımen barlyq salada, onyŋ ışınde turizm baǧyty boiynşa da yntymaqtastyqty damytu men nyǧaitudyŋ oŋ serpını baiqalady. Almatynyŋ mädeni jäne turistık astana retınde bekıtıluı turizm salasyndaǧy körsetkışterdı jaqsartady. Barşaŋyzdy Qazaqstanǧa kelıp, elımızdıŋ körıktı jerlerımen jäne mädeniet salasyndaǧy jūmysymyzdyŋ nätijelerımen tanysuǧa şaqyramyn», - dedı QR Mädeniet jäne sport ministrı Ashat Oralov.
Esterıŋızge sala keteiık, Qazaqstan 2023 jyldyŋ şıldesınen 2024 jyldyŋ şıldesıne deiın Şanhai yntymaqtastyq ūiymyna töraǧalyq etedı.
