Shyǵys Qazaqstan oblysy, Kúrshim aýdany, Maraldy aýylynda altyn óndirý fabrıkasyn salyp jatqan kompanııaǵa turǵyndar narazylyq bildirgen edi. Jergilikti halyqtyń shaǵymyna qulaq asqan mamandar kompanııaǵa 3 mln teńgege jýyq aıyppul saldy, dep habarlaıdy "Adyrna" ulttyq portaly.
Byltyr Shyǵys Qazaqstan oblysy, Kúrshim aýdany Maraldy aýylynyń halqy altyn óndirýshi kompanııanyń jumysyna narazylyq bildirip, ekologııanyń buzylyp jatqandyǵyna shaǵymdanǵan. Sonymen qatar, olar memleket basshysyna hat jazyp, aımaqta zańsyz altyn qazyp áketetinderdiń artqanyn aıtqan-tuǵyn.
Ekologııa jáne tabıǵı resýrstar mınıstrliginiń ókili altyn kenishindegi daýly máseleniń zań sheńberinde ǵana sheshilýi tıistigin málim etti.
Jergilikti turǵyndardyń aıtýynsha, "altyn shyqqan jerdi belden qazýǵa oqtalǵan" kompanııa óndiriste ıanıd qoldanady. Turǵyndar ıanıdtiń sýǵa tússe, aýmaqty tutas ýlaıtynyn aıtady. Metallýrgter kerisinshe, jańa fabrıkanyń múldem qaýipsiz jáne tabıǵatqa eshqandaı qaýip tóndirmeıtinin alǵa tartady.
ShQO Ekologııa departamenti atalǵan aýylda altyn fabrıkasyn salyp jatqan «VSAM Production» JShS-ne qatysty tekserý júrgizdi. Sonyń nátıjesinde birqatar zańbuzýshylyq anyqtaldy.
«Tekserý jumystary 3 aptadan astam ýaqytqa sozyldy. Kásiporynnyń qorshaǵan ortaǵa áserdi baǵalaý nátıjeleri boıynsha memlekettik ekologııalyq saraptama qorytyndysynyń talaptaryn saqtamaǵany anyqtaldy. Sondaı-aq jabdyqtalmaǵan ýchaskelerde óndiristik qaldyqtar saqtalǵan. Sol qaldyqtarmen jumys isteý talaptary buzylǵan. Jerdiń munaı ónimderimen lastaný faktileri de tirkeldi», - dep habarlady departamenttiń baspasóz qyzmeti.
Ekologtar tekserýden soń 5 ákimshilik is qozǵady. Kompanııaǵa 3 mln teńgege jýyq aıyppul salyndy.
"Adyrna" ulttyq portaly
