Bügın, 20 nauryzda Astanada parlamenttıŋ bırlesken otyrysynda Qasym-Jomart Toqaev saltanatty türde ant berdı.
20 nauryz tüskı saǧat 12:00-de bastalǧan ant beru räsımıne parlament deputattary, ükımet müşelerı, bilıktıŋ özge de tarmaq ökılderınen bölek eldıŋ tūŋǧyş prezidentı Nūrsūltan Nazarbaev qatysty. Ony parlament deputattary oryndarynan tūryp, ūzaq şapalaqtap qarsy aldy.
Osydan soŋ Qazaqstan parlamentı senatynyŋ töraǧasy qyzmetın atqarǧan Qasym-Jomart Toqaev keldı. Ant beru räsımı aldynda konstitusiialyq keŋes töraǧasy Qairat Mämi Ata zaŋnyŋ 42-babyna säikes, Toqaevtyŋ ant bergen sätınen bastap prezident qyzmetıne kırısetının aitty. Būdan keiın Qasym-Jomart Toqaev saltanatty türde ant berdı.
"Qazaqstan halqyna adal qyzmet etuge, Qazaqstan Respublikasynyŋ Konstitusiiasy men zaŋdaryn qataŋ saqtauǧa, azamattardyŋ qūqyqtary men bostandyqtaryna kepıldık beruge, Qazaqstan Respublikasy Prezidentınıŋ özıme jüktelgen märtebelı mındetın adal atqaruǧa saltanatty türde ant etemın" dedı Toqaev.
El konstitusiiasynyŋ 48-babynyŋ 1-tarmaǧyna säikes, Qazaqstan prezidentınıŋ ökıletı merzımınen būryn toqtatylǧan jaǧdaida onyŋ ökıletı parlament senatynyŋ töraǧasyna köşedı. Ol būl qyzmettı jaŋa prezident sailanǧanǧa deiın atqarady.
Qazaqstan Konstitusiiasyna säikes, naqty jaǧdaida el prezidentı ökıletın alǧan Qasym-Jomart Toqaev senat töraǧasy qyzmetınen bosatylady.
Ant bergennen keiın söz alǧan Qazaqstannyŋ prezidentı Qasym-Jomart Toqaev Nūrsūltan Nazarbaevtyŋ "memleket üşın sıŋırgen eŋbegın" atap ötıp, memleket astanasyna tūŋǧyş prezident Nūrsūltan Nazarbaevtyŋ esımın berudı ūsyndy.
"Qazaqstan astanasyn Nūrsūltan dep ataudy ūsynamyn" dedı ol.
Eldıŋ tūŋǧyş prezidentı Nūrsūltan Nazarbaev jäne Qazaqstan prezidentı Qasym-Jomart Toqaev. Astana, 20 nauryz 2019 jyl.
Būǧan qosa Toqaev tūŋǧyş prezidenttıŋ qūrmetıne el astanasynda monument ornatudy, "barlyq oblystardaǧy basty köşelerge Nūrsūltan Nazarbaevtyŋ atyn beru turaly" ūsynys aitty.
Prezident qyzmetıne kırısken Toqaev alǧaşqy jarlyǧymen Nūrsūltan Nazarbaevqa "Halyq qaharmany" ataǧyn berıp, "Altyn qyran" ordenın tapsyrdy. Ol Nūrsūltan Nazarbaevty "saiasi ūstazym" dep atap, alǧys bıldırdı. Ol söz arasynda eldegı bilıktıŋ "qaqtyǧyssyz beibıt jolmen auysyp jatqanyn" atap öttı.
19 nauryzda Qazaqstan prezidentı Nūrsūltan Nazarbaev respublikalyq telearnalardan halyqqa ündeu jasap, prezidenttık ökıletın toqtatatynyn mälımdedı.
Nazarbaev ündeu jasap jatqanda qol qoiǧan "Qazaqstan Respublikasy prezidentınıŋ ökıletın atqaru turaly" jarlyqqa säikes, onyŋ prezidenttık ökıletı 20 nauryzda toqtatyldy.
65 jastaǧy Qasym-Jomart Toqaev 90-şy jyldardyŋ soŋy 2000-şı jyldar basynda Qazaqstannyŋ syrtqy ıster ministrı, premer-ministrı boldy. Jenevadaǧy BŪŪ ökıldıgınde türlı qyzmet atqardy. Qazaq, orys, aǧylşyn jäne qytai tılderınde söileidı.
Qasym-Jomart Toqaev kım? (19.03.2019 jyl).
AQŞ JÄNE EUROODAQ REAKSİIаSY
AQŞ memlekettık departamentı 19 nauryzda AQŞ-tyŋ Qazaqstanmen "tūraqty" bailanysy Nazarbaev otstavkasynan keiın de jalǧasa beredı dep mälımdedı. "AQŞ jäne Qazaqstan tyǧyz ekıjaqty qarym-qatynasty qoldaidy, oǧan ötken jyly prezident [Donald] Tramp pen prezident Nazarbaevtyŋ tarihi kezdesuı dälel. Būl impuls ärı qarai da jalǧasa beredı dep kütemız" dedı AQŞ memlekettık departament ökılı seisenbı künı.
Nūrsūltan Nazarbaev 2018 jyly qaŋtar aiynda AQŞ-qa resmi saparmen barǧan. AQŞ-taǧy kezdesuler negızınen aimaq qauıpsızdıgı, ekonomikalyq mäseleler jäne ekıjaqty qarym-qatynasty damytuǧa arnalǧan.
Europa Odaǧynyŋ (EO) syrtqy saiasat jönındegı joǧarǧy ökılı Federika Mogerini Nazarbaevtyŋ "reforma jürgızu" jäne "aimaqtyq, älemdık deŋgeide beibıtşılık, tūraqtylyq jäne qauıpsızdıkke erekşe baǧyttalǧan ärıptestıktı damytudaǧy maŋyzdy rölın" joǧary atap ötken.
"Bız auysudyŋ Qazaqstan Konstitusiiasyna säikes bırqalypty ötkenın qalaimyz" dedı baspasöz hatşysy Maiia Kosianchich.
Qazaqstan prezidentınıŋ baspasöz qyzmetı Nazarbaevtyŋ prezident ökıletın toqtatatyny jaily şeşımdı Resei prezidentı Vladimir Putinmen talqylaǧanyn habarlap, ekı el jetekşılerınıŋ "bolaşaqta tūraqty bailanysty jalǧastyru turaly" kelıskenın mälımdedı.
"Adyrna" ūlttyq portaly
