Kinogerlerdıŋ Mädeniet ministrlıgıne qarasty "Ūlttyq kinony qoldau memlekettık ortalyǧynyŋ" şeşımıne narazylyǧynan Ükımet tolyq habardar bolmai şyqty. Habardar bolǧan künnıŋ özınde jaǧdaidy baqylauda ūstap otyrǧan joq. Premerdıŋ orynbasary Altai Kölgınovtıŋ keşegı äreketı sony körsettı. Degenmen ol kinogerlerdı qabyldauǧa uäde ettı. Alaida Mädeniet ministrı aldynda ǧana kinogerlerdı qabyldamai, qaitaryp jıbergen. Keibırıne aiyppūl salynǧan.
«QABYLDAIMYN. ATY-JÖNIN BERIŊIZ»
Ötken aida bır top öner maitalmandary Almatydan Astanaǧa kelıp, Mädeniet ministrlıgınıŋ aldyna öz narazylaqtaryn bıldırgen bolatyn. Alaida elımızdegı eŋ jas ministr Ashat Oralovtyŋ özı olardy qabyldamaǧan.
6 mausymdaǧy ükımet otyrysynan keiın premer-ministr Älihan Smaiylovtyŋ ideologiiaǧa jauapty orynbasary Altai Kölgınovten kinogerlerdıŋ mäselesın sūradyq. Bır qyzyǧy ükımetbasynyŋ orynbasary Almatydan Astanaǧa arnaiy kelgen azamattardyŋ mäselesınen asa tanys emes bolyp şyqty.
- Būl mäselemen ministrlık ainalysyp jatyr. Qazır men sızge jauap bere almaimyn. Ony ministrlıkten sūrau kerek. Eger qajet bolsa, ministrlık jauabyn beredı. Men qazır jauap bere almaimyn. Olardyŋ talaptary qandai ekenın qarauym kerek, - dep Altai Kölgınov tırı sasqan.
Artynşa «Kinogerlerdı qabyldaisyz ba?» degen saualǧa ol «Qajet bolsa qabyldaimyn, qabyldaimyn. Aty-jönın berıŋız,» - dep Ükımet üiı korridorynda täp-täuır qalbalaqtap qaldy.
MİNİSTRLIK QŪRǦAN KOMİSSİIа
Būǧan deiın bır top kinogerler "Ūlttyq kinony qoldau memlekettık ortalyǧynyŋ" şeşımıne narazy bolyp, Almatyda mitingke şyqqan bolatyn. Keiın Azamat Şarǧyn, Elzat Eskendır sekıldı azamattarǧa «zaŋsyz miting ötkızdı» degen jeleumen aiyppūl salyndy.
Mäselen, Azamat Şarǧyn ädılettı şeşım şyqqanşa küresetının aitady.
- Būǧan deiın äleumettık jelıde «Ötırıkşı Oralov pa, joq älde Däueşov pe?» degen jazba jariialaǧan bolatynmyn. Mäselen, Mädeniet vise-ministrı Nūrǧisa Däueşov 18 mamyr künı jariialaǧan jazbasynda «Ministr ötken jäne ötpegen 290 joba qaita tekserılsın» dep tapsyrma bergenın jazdy. Bıraq olar Mädeniet komitetınıŋ būrynǧy töraiymy Roza Kärıpjanovanyŋ būiryǧy arqyly tek qana ötpegen 153 jobany qaita qaraityn bolady. Bız sol kezde ministrlık tarapynan qūrylǧan komissiiaǧa senımsızdık bıldıretınımızdı aittyq. Öitkenı äu bastaǧy talabymyz boiynşa komissiianyŋ qūramynda bızdıŋ tarapymyzdan ekı täuelsız zaŋger jäne Qazybek İsa komissiia töraǧasy bolsyn dep aitqanbyz. Bıraq ministrlık bızdıŋ būl talabymyzdy oryndamady. Komissiia qūramyna Qazybek İsany kırgızdı de, ministrlıkten 3 adam jäne käsıpkerler odaǧynan bır zaŋgerdı alyp, jalpy 5 adamdy alyp kelıp otyr. Al Qazybek İsa plenarlyq otyrystar kezınde komissiia otyrysyna tolyq qatysa almaidy eken. Erteŋ qandai da bır mäsele dauysqa salynsa, 3/2 nemese 4/1 bolyp kete me dep alaŋdap otyrmyz. Mysaly, ministrlıkten ūsynylyp otyrǧan 3 adamnyŋ pozisiiasy arqyly şeşım 3/2 dauyspen qabyldanyp ketedı. Mūny bız qalai täuelsız komissiia dep aita alamyz. Būl täueldı komissiia bolady. Sondyqtan da komissiiaǧa senımsızdık bıldırıp otyrmyz. Bıraq ta komissiia zaŋ boiynşa qūrylyp, qazır jūmys ıstep jatyr. Bız öz tarapymyzdan bırneşe talaptardy aittyq. Bıraq ony ministrlık oryndap jatyr ma, joq pa ony qūdai bıledı», – dedı akter.
Azamat Şarǧyn «Öz basym Kölgınov bızdı qabyldaidy degenge senbeimın. Bıraq qabyldasa jaqsy bolar edı» deidı.
Qysqasy, Ashat Oralov kerı qaitarǧan kinogerlerdı Altai Kölgınov ne ıstei alady, körelık.
Serık JOLDASBAI,
"Adyrna" ūlttyq portaly
Ūqsas jaŋalyqtar
