Qazaqstannyń syrtqy boryshy 158,8 mıllıard AQSh dollaryna jetken
2018 jyldyń 4-shi toqsanynda Qazaqstannyń syrtqy boryshy ekonomıkanyń banktik emes sektory mindettemeleriniń azaıýy esebinen 2,5 mıllıard AQSh dollaryna qysqardy.
2019 jyldyń 1 qańtaryndaǵy málimet boıynsha Qazaqstan Respýblıkasynyń syrtqy boryshy 158,8 mıllıard AQSh dollaryn nemese IJÓ-ge shaqqanda 93,1%-ti (jyl basynan beri 9,5%-ǵa jaqsardy) qurady, dep habarlady ulttyq banktiń baspasóz qyzmeti.
"2018 jyldyń 4-shi toqsanynda Qazaqstannyń syrtqy boryshy ekonomıkanyń banktik emes sektory mindettemeleriniń azaıýy esebinen 2,5 mıllıard AQSh dollaryna qysqardy. Memlekettik syrtqy borysh jalpy somasy 1,05 mıllıard eýrony quraıtyn 5 jáne 10 jyldyq táýelsiz eýrooblıgaııalardyń eki transhyn shyǵarý esebinen 899,1 mıllıon AQSh dollaryna ósti", - dep túsinikteme berdi Ulttyq bank.
"Basqa sektorlardyń" úlestes emes kredıtorlar aldyndaǵy syrtqy boryshy 1,6 mıllıard AQSh dollaryna azaıdy, ol negizinen, qaryzdardy óteý esebinen, onyń ishinde ERG toby kásiporyndarynyń mindettemelerin qaıta qarjylandyrý (963 mıllıon AQSh dollaryna azaıdy), "QazMunaıGaz" UK" AQ-tyń "Sberbank Rossıı" PAO aldyndaǵy (371 mıllıon AQSh dollary) jáne "Qaztemirtrans" AQ-tyń EQDB aldyndaǵy qaryzdaryn óteý esebinen boldy.
Fırmaaralyq bereshek iri ken óndirýshi jáne kólik kompanııalarynyń sheteldik tel uıymdardan tartylǵan nesıeni óteýi nátıjesinde 1,8 mıllard AQSh dollaryna qysqardy.
Qazaqstannyń taza syrtqy boryshy 2018 jyldyń 4-toqsanynda 560,5 mıllıon AQSh dollaryna azaıyp, 47,2 mıllıard AQSh dollaryn qurady.
Sputnik.
