Deputat Däulet Tūrlyhanov öz ūlynyŋ keşelı bergı jaǧdaiyn baiadap, qazaqstandyqtarǧa ündeu jasady. El özektı dep tapqan mäselenıŋ basyn basqa arnaǧa būru qajet ekenın habarlady, dep jazady "Adyrna" ūlttyq portaly.
Deputat öz ūlyna qatysty keşe örbıgen oqiǧaǧa pıkır bıldırıp, qazaqstandyqtarǧa ündeu tastady:
- Qūrmettı Qazaqstandyqtar! Soŋǧy kezde menıŋ ūlyma qatysty aqparat keŋıstıgınde tarap jatqan habarlarǧa bailanysty özderıŋızge ündeuımdı jariialap otyrmyn. Soŋǧy bes aida äleumettık jelılerde ūlyma qatysty jaǧdaiǧa bailanysty öte köp aqparat şyǧyp jatyr. İia, būl jaǧdaidyŋ bolǧany ras, alaida ony qoǧamdyq ortaǧa qaita-qaita sala berudıŋ jönı joq dep esepteimın. Jaǧdai oryn alǧanda, men öz pıkırımdı aşyq aitqanmyn. Barlyq jaǧdai zaŋ jüzınde şeşıluı kerek degenmın. Qazırgı kezde qoǧamdyq ortada menıŋ ūlymnyŋ bır qatelıgınen basqa, qanşama aitylatyn özektı mäseleler bar emes pe?! Osy oraida, ūlyma bailanysty jaǧdaidyŋ qoǧamda ülken aqparatqa ainalǧany tüsınıksız. Jaraidy, aqparattar şyǧyp jatyr, osy arqyly haip jinap, qoǧamda reitingın ösıremın degender öz maqsatyna jetken şyǧar. Endı menıŋ oiymşa būl mäselenı osy jerden doǧarǧanymyz dūrys, - dedı deputat.Sonymen qatar, Däulet Tūrlyhanov mūndai aqparattar ūlynyŋ jüike talşyqtaryn tügesıp, jıgıttık şaǧynda eŋsesın basatynyn jetkızdı:
- Osy aqparattar menıŋ ūlyma ülken psihologiialyq auyrtpalyq tüsırıp jürgenın sezemın. Ol älı jap-jas jıgıt. Onyŋ jasaǧany dizertirlık emes, bylaişa aitqanda, balalyqqa salynyp «samovolkaǧa» şyǧyp ketkenı. Men ūlymnyŋ Qazaqstan Qaruly küşterınıŋ sapynda jauynger bolyp jürgenın maqtan etemın. Ol jastyqtyŋ jalynymen qatelık jasaǧany tüsınıktı. Ǧaşyq bolyp jürgen bala, süigen qyzy kelgen eken, soǧan şyǧyp ketken. Būl endı jastyq sezım, mahabbat sezımı. Ärine, men ony aqtamaimyn. Qai ata-ana özınıŋ balasyn jaman bolsyn deidı?! Osy jaǧdaiǧa bailanysty aqparattardan habardar bolyp otyrǧan balamnyŋ qazırgı psihologiialyq jaǧdaiy menı qatty alaŋdatady. Qūdai saqtasyn, osy jaǧdai balamnyŋ taǧdyryn tälkekke salyp, qandai da bır oqys äreketke baruyna sebep bolsa, men de öz tarapymnan qarap qalmaimyn, qoldanystaǧy zaŋ şeŋberınde äreket etemın, - dep jazdy deputat.Deputattyŋ aituynşa, ūlyn būlai "töpelei beru" onyŋ abyroiyn eşqandai da aqsata almaidy.
- Men ömırımnıŋ basym bölıgın ülken sportqa arnaǧan adammyn. On jyl SSSR qūramasynda kürestım, Täuelsız Qazaqstannyŋ tuyn tūŋǧyş ret Olimpiada oiyndarynda köterıp şyqtym. Özım sportty qoiǧannan keiın, bapker retınde Aziia, Aziia oiyndary, Älem jäne Olimpiada chempiondaryn tärbielep şyǧardym. Men qazaqtyŋ ūly bolǧanyma maqtanamyn! Qazaq üşın tögılgen qara terım men ölşeusız eŋbegımdı halqym baǧalaǧan, älı de baǧalap, qūrmettep keledı. Bügıngı kündegı abyroiym - orasan eŋbektıŋ arqasynda kelgen. Al menıŋ ūlymmen bolǧan bır ǧana jaǧdai – halyq aldyndaǧy abyroiymdy tüsıre almaidy. Qoǧamdy dürlıktırıp, aqparat taratyp jürgender osyny tüsınse eken deimın. Qūrmettı dostar! Taǧy da qaitalap aitqym keledı, ūlyma qatysty tergeu amaldary jürgızılıp jatyr. Bärı zaŋ şeŋberınde şeşıletın bolady. Tüsınıstıkpen qaraularyŋyzdy sūraimyn, - dedı ol.Esterıŋızge sala keteiık, keşe deputattyŋ ūlyn QR Qorǧanys ministrlıgınıŋ ökılderı bır joǧaltyp, bır tapqan edı. Būǧan deiın Däulet Tūrlyhanovtyŋ ūly äskeri bölımnen qaşqany turaly habarlanǧan bolatyn.
"Adyrna" ūlttyq portaly
