Búgin Shymkent qalasynyń ákimi Murat Áıtenov UOS ardagerleri Abylaı Qazybaev, Nına Egorqyzy Mosýnova, Murataly Tólepbergenulynyń shańyraqtaryna arnaıy baryp, qart maıdangerlerdi quttyqtap qaıtty.
Árqaısysy ǵasyrǵa jýyq ǵumyr keshken, urpaq jadynda óshpesteı iz qaldyrǵan abyz qarııalarymyzdyń ómir joly bir dastan.
Jastyq shaǵynyń eń aıaýly kúnderin qııankeski joryqqa arnaǵan ata-apalarymyzǵa Murat Dúısenbekuly qurmet kórsetip, izgi tilegin jetkizdi. Otbasyna kelgen qala basshysyn jyly shyraımen qarsy alǵan ańyz aqsaqaldarymyz aq batasyn berip, barsha shymkenttikterge beıbit ómir men elimizge jarqyn bolashaq tiledi.
