Parlament Mäjılısınıŋ deputaty Maqsat Tolyqbai Almaty oblysy, Qarasai audany, Şalqar auylynda tolyq kürdelı jöndeuden ötken mektep ǧimaratynyŋ 15 million teŋgege satylyp ketkenı jaily mäsele köterıp edı. Bız bügın deputat Maqsat Tolyqbaiǧa tura osyǧan ūqsas problema bızde de bar ekenın mälımdegımız keledı. Ūrpaq bolaşaǧy üşın şyryldaǧan ata-analardyŋ janaiqaiyn deputat Mäjılıs qabyrǧasynan köterıp, balalarymyzdyŋ özge jetkınşektermen teŋ qūqyly bılım aluyna mümkındık jasap berer degen ümıtımız bar.
Qūrmettı, Maqsat Tolyqbai myrza!
Bız Almaty oblysy, Qarasai audany, Qaskeleŋ qalasynyŋ, Halifa Altai, Suyqbūlaq, Balqaş, Esıl köşelerı bastaǧan on-on bes köşenıŋ tūrǧyndarymyz. Bızdıŋ tūrǧan jerdı demografiiasy qarqyndy damyǧan aty joq şaǧyn audan dese de bolady. Qarasai audandyq mäslihatynyŋ 09.01.2020 jyly №54-4 şeşımımen bekıtılgen Qaskeleŋ qalasynyŋ Bas josparynda bız tūrǧan aumaqqa mektep ǧimaratynyŋ boi köteretını anyq körsetılgen. Atalǧan aumaqqa jūrt jappai qonystanǧanyna 12 jyldan asty. Halyq "mektep salynady" dep 12 jyl boiy zaryǧa kütken sol aumaq jekemenşıkke satylyp ketıptı.
Bızdıŋ Qarasai audan äkımıne jazǧan hatymyzǧa "jerdı memleket mūqtajdyǧy üşın qaita satyp aluǧa jäne mektep qūrylysyna 2023 jylǧa qarajat qarastyrylmaǧany" turaly Qarasai audanynyŋ "Qūrylys, säulet jäne qalaqūrylysy bölımınıŋ" jauaby keldı. Esesıne, satylyp ketken jerge boi köteruge tiıs mektep, "Jaily mektep" jobasymen "Altyn auyl" şaǧyn audanyndaǧy eskı mekteptıŋ qasyna salynatyn bolypty.
"Altyn auyl" şaǧyn audany men bız tūrǧan jerdıŋ arasy tört şaqyrym jer. Bızdıŋ balalarymyz jiyrma jyldan berı onsyz da sol "Altyn auyl" şaǧyn audanyndaǧy mektepke qatynap, aiaqtarynan tozyp jür. Qystyŋ közı qyrauda mektep tabaldyryǧyn endı attaǧan 6-7 jastaǧy balanyŋ 4 şaqyrym jerdegı mektepke jaiau baratyny, üiıne taǧy 4 şaqyrym jer jaiau qaitatyny, künıne är bala mındettı bılımın alu üşın 8 şaqyrym jaiau jüretını audan atqamınerlerın oilandyrmai otyr. Ülken synyptar qosymşa sabaq, mekteptıŋ türlı şaralaryna baratyn kezderı de jiı bolyp tūrady. Mūndai künderı 8 şaqyrym jol 16 şaqyrymǧa ūzarady. Onyŋ üstınde köşelerde jaryq joq. Är ata-ana qaraŋǧyda balalarynyŋ aman-esen üiıne qaituyn uaiymdaumen otyrady. Bolmasa, bala-şaǧasyn mektepten kütıp alyp, olar da 8 şaqyrym jerdı jaiau jüruge mäjbür. Köşe tolǧan it. Balalar mektepke baryp-kelu tauqymetımen qosa, ittermen arpalysuǧa mäjbür. Mektepke barar joldyŋ teŋ jarymynan köbınde asfalt töselmegen. Asfalt töselgen jol tar. Maşinalar ol jolda öte jyldam jüredı. Balalarymyzdy kölık qaǧyp ketuı äbden mümkın ekenı aitpasa da tüsınıktı.
Audan şendılerı bızdı ylǧi da sabyrǧa şaqyrumen, uäde berumen aldap keledı. Şydamnyŋ da şegı bar. Memlekettıŋ qoldauymen "Jaily mektep" jobasymen salynatyn bılım ordasy qalanyŋ Bas josparynda körsetılgen, qazır jeke qolǧa satylyp ketken jerge salynuyn talap etemız. Sebebı, ol jer älı künge bos tūr. Eşqandai qūrylys salyna qoimady.
Memleket audanymyzǧa "Jaily mektep" baǧdarlamasymen bılım oşaǧyn saluǧa qarajat bölıp otyr. Ol mektep 4 şaqyrym jer qaşyqtaǧy bızdıŋ köşelerge jaily bolmaiyn dep tūr. Logikaǧa süiensek, memleket bölgen qarjyǧa mektebı joq aumaqqa bılım ordasy salynuy kerek emes pe? Joq älde, qarasailyq şeneunıkter Şalqar auylyndaǧy siiaqty eskı mekteptıŋ janynan jaŋasyn salyp, eskı mekteptıŋ ǧimaratyn da satyp jıberudı josparlap otyr ma? Ärine, küdık keltıruge haqymyz bar dep oilaimyz!
Qūrmettı, Maqsat Tolyqbai myrza!
Qarasailyq qara halyqtyŋ būl ötınışın jerde qaldyrmai, "Jaily mektep" jobasymen salynǧaly jatqan mektep ǧimaratyn tūrǧyny köp aumaqqa, qalanyŋ Bas josparynda körsetılgen jerge boi köteruıne yqpal etuıŋızdı ötınemız! Bızdıŋ balalarymyz da özge jetkınşekterdei jaqyn jerdegı mektepte oqyp, bılım aluǧa qūqy bar. El senımıne ie bolǧan deputat retınde sol büldırşınderdıŋ qūqyǧyn öz balasynyŋ qūqyǧyndai qorǧaidy dep bır özıŋızge senım artyp otyrmyz!
Qūrmetpen, myŋdaǧan ata-ananyŋ atynan Serık Saqtaǧan
Adyrna.kz
