Parlament Májilisiniń depýtaty Maqsat Tolyqbaı Almaty oblysy, Qarasaı aýdany, Shalqar aýylynda tolyq kúrdeli jóndeýden ótken mektep ǵımaratynyń 15 mıllıon teńgege satylyp ketkeni jaıly másele kóterip edi. Biz búgin depýtat Maqsat Tolyqbaıǵa týra osyǵan uqsas problema bizde de bar ekenin málimdegimiz keledi. Urpaq bolashaǵy úshin shyryldaǵan ata-analardyń janaıqaıyn depýtat Májilis qabyrǵasynan kóterip, balalarymyzdyń ózge jetkinshektermen teń quqyly bilim alýyna múmkindik jasap berer degen úmitimiz bar.
Qurmetti, Maqsat Tolyqbaı myrza!
Biz Almaty oblysy, Qarasaı aýdany, Qaskeleń qalasynyń, Halıfa Altaı, Sýyqbulaq, Balqash, Esil kósheleri bastaǵan on-on bes kósheniń turǵyndarymyz. Bizdiń turǵan jerdi demografııasy qarqyndy damyǵan aty joq shaǵyn aýdan dese de bolady. Qarasaı aýdandyq máslıhatynyń 09.01.2020 jyly №54-4 sheshimimen bekitilgen Qaskeleń qalasynyń Bas josparynda biz turǵan aýmaqqa mektep ǵımaratynyń boı kóteretini anyq kórsetilgen. Atalǵan aýmaqqa jurt jappaı qonystanǵanyna 12 jyldan asty. Halyq "mektep salynady" dep 12 jyl boıy zaryǵa kútken sol aýmaq jekemenshikke satylyp ketipti.
Bizdiń Qarasaı aýdan ákimine jazǵan hatymyzǵa "jerdi memleket muqtajdyǵy úshin qaıta satyp alýǵa jáne mektep qurylysyna 2023 jylǵa qarajat qarastyrylmaǵany" týraly Qarasaı aýdanynyń "Qurylys, sáýlet jáne qalaqurylysy bóliminiń" jaýaby keldi. Esesine, satylyp ketken jerge boı kóterýge tıis mektep, "Jaıly mektep" jobasymen "Altyn aýyl" shaǵyn aýdanyndaǵy eski mekteptiń qasyna salynatyn bolypty.
"Altyn aýyl" shaǵyn aýdany men biz turǵan jerdiń arasy tórt shaqyrym jer. Bizdiń balalarymyz jıyrma jyldan beri onsyz da sol "Altyn aýyl" shaǵyn aýdanyndaǵy mektepke qatynap, aıaqtarynan tozyp júr. Qystyń kózi qyraýda mektep tabaldyryǵyn endi attaǵan 6-7 jastaǵy balanyń 4 shaqyrym jerdegi mektepke jaıaý baratyny, úıine taǵy 4 shaqyrym jer jaıaý qaıtatyny, kúnine ár bala mindetti bilimin alý úshin 8 shaqyrym jaıaý júretini aýdan atqaminerlerin oılandyrmaı otyr. Úlken synyptar qosymsha sabaq, mekteptiń túrli sharalaryna baratyn kezderi de jıi bolyp turady. Mundaı kúnderi 8 shaqyrym jol 16 shaqyrymǵa uzarady. Onyń ústinde kóshelerde jaryq joq. Ár ata-ana qarańǵyda balalarynyń aman-esen úıine qaıtýyn ýaıymdaýmen otyrady. Bolmasa, bala-shaǵasyn mektepten kútip alyp, olar da 8 shaqyrym jerdi jaıaý júrýge májbúr. Kóshe tolǵan ıt. Balalar mektepke baryp-kelý taýqymetimen qosa, ıttermen arpalysýǵa májbúr. Mektepke barar joldyń teń jarymynan kóbinde asfalt tóselmegen. Asfalt tóselgen jol tar. Mashınalar ol jolda óte jyldam júredi. Balalarymyzdy kólik qaǵyp ketýi ábden múmkin ekeni aıtpasa da túsinikti.
Aýdan shendileri bizdi ylǵı da sabyrǵa shaqyrýmen, ýáde berýmen aldap keledi. Shydamnyń da shegi bar. Memlekettiń qoldaýymen "Jaıly mektep" jobasymen salynatyn bilim ordasy qalanyń Bas josparynda kórsetilgen, qazir jeke qolǵa satylyp ketken jerge salynýyn talap etemiz. Sebebi, ol jer áli kúnge bos tur. Eshqandaı qurylys salyna qoımady.
Memleket aýdanymyzǵa "Jaıly mektep" baǵdarlamasymen bilim oshaǵyn salýǵa qarajat bólip otyr. Ol mektep 4 shaqyrym jer qashyqtaǵy bizdiń kóshelerge jaıly bolmaıyn dep tur. Logıkaǵa súıensek, memleket bólgen qarjyǵa mektebi joq aýmaqqa bilim ordasy salynýy kerek emes pe? Joq álde, qarasaılyq sheneýnikter Shalqar aýylyndaǵy sııaqty eski mekteptiń janynan jańasyn salyp, eski mekteptiń ǵımaratyn da satyp jiberýdi josparlap otyr ma? Árıne, kúdik keltirýge haqymyz bar dep oılaımyz!
Qurmetti, Maqsat Tolyqbaı myrza!
Qarasaılyq qara halyqtyń bul ótinishin jerde qaldyrmaı, "Jaıly mektep" jobasymen salynǵaly jatqan mektep ǵımaratyn turǵyny kóp aýmaqqa, qalanyń Bas josparynda kórsetilgen jerge boı kóterýine yqpal etýińizdi ótinemiz! Bizdiń balalarymyz da ózge jetkinshekterdeı jaqyn jerdegi mektepte oqyp, bilim alýǵa quqy bar. El senimine ıe bolǵan depýtat retinde sol búldirshinderdiń quqyǵyn óz balasynyń quqyǵyndaı qorǵaıdy dep bir ózińizge senim artyp otyrmyz!
Qurmetpen, myńdaǵan ata-ananyń atynan Serik Saqtaǵan
Adyrna.kz
