Qaŋtar oqiǧasy kezınde qaza tapqan qyzdyŋ äkesı sot otyrysyna jıberılmedı degen aqparatqa qatysty bas äskeri prokuratura tüsınıkteme berdı, dep habarlaidy “Adyrna” tılşısı qadaǧalau organynyŋ resmi saityna sılteme jasap.
«Özderıŋızge belgılı, Almaty garnizonynyŋ Äskeri soty äskeri qyzmetşı Jūman A.İ.-ǧa ıs materialdarynda jariia etuge jatpaityn qūpiia qūjattar bar degen aiyppen qylmystyq ıstı qarauda. Bügın marqūm Aikörkemnıŋ äkesı Aidos Meldehan BAQ ökılderıne sot otyrysyna jıberılmegenın aitqan. Meldehanǧa bırneşe ret ūsynys jasaldy, onyŋ ışınde aǧymdaǧy jyldyŋ 19 şıldesınde Bas äskeri prokuratura basşylyǧynyŋ qabyldauynda bolǧan. Bıraq azamat tırkeuden jäne arnaiy tekseruden ötuden bas tartty», - delıngen habarlamada.
Äskeri prokuratura būǧan onyŋ qylmystyq ıske qosa berılgen jazbaşa mälımdemesı dälel ekenın qosa aitty.
Qaiǧyly oqiǧa 2022 jyldyŋ 7 qaŋtarynda oryn alǧan bolatyn. Qazaqstannyŋ būrynǧy balalar qūqyqtary jönındegı uäkılı Arujan Sain keşkı saǧat 19:00-de Seifullin men Sätbaev köşelerınıŋ qiylysynda apaly-sıŋlıler mıngen kölıkke oq jaudyrylǧanyn habarlaǧanyn eske salamyz. 4 jasar Aikörkem sol jerde tıl tartpai kettı. Onyŋ 15 jasar äpkesı oq jaraqatymen auruhanaǧa tüsıp, aman qalǧan. 4 jasar qyzdyŋ ölımıne qatysty ıstı Almaty garnizonynyŋ Äskeri soty qarauda.
Ūqsas jaŋalyqtar
