Qoşanov: Katonqaraǧaiǧa jaŋa jol salu şekaralas öŋırdıŋ damuyn jedeldetedı

Bügın Parlament Mäjılısınıŋ Spikerı, «AMANAT» töraǧasy Erlan Qoşanov partiianyŋ Respublikalyq qoǧamdyq qabyldau bölmesınde azamattardy jeke qabyldady. Elımızdıŋ är öŋırınıŋ tūrǧyndary infraqūrylymdy damytuǧa, taza auyz sumen qamtamasyz etuge, erekşe qajettılıkterı bar adamdardy qoldauǧa qatysty jäne basqa da mäselelermen «AMANAT» partiiasyna jügındı. Mäselen, Şyǧys Qazaqstan oblysyndaǧy Altai qalasynyŋ 40 myŋ tūrǧyny atynan habarlasqan bır top azamat Osinov asuyn ainalyp ötetın jaŋa jol salu mäselesın köterdı. Onda jyl saiyn myŋdaǧan turist keledı.

«Altai jäne şekara maŋyndaǧy Katonqaraǧai audandarynyŋ tūrǧyndary üşın būl joldyŋ maŋyzy zor. Mūndaǧy qūrylys 2018 jyly bastalǧan edı, bıraq keiın tolyǧymen toqtap qaldy. Memlekettık orman qorynan jer telımderın beru jūmystary keşıktırıluıne bailanysty joldy jöndeuge qajet materialdar qymbattap kettı. Sızden joldy jöndeu jūmystaryn tezdetuge kömek körsetuıŋızdı sūraimyz», – delıngen azamattardyŋ ūjymdyq ündeuınde.

Erlan Qoşanov partiia filialyna İndustriia jäne infraqūrylymdyq damu ministrlıgımen jäne Şyǧys Qazaqstan oblysynyŋ äkımdıgımen bırlese otyryp, jol qūrylysyna qajettı barlyq jer telımın beru mäselesın tez arada şeşudı tapsyrdy. Sondai-aq qajettı qarajatty böludı jedeldetu kerek ekenın aitty.

«Memleket basşysy Qasym-Jomart Toqaev şekara maŋyndaǧy öŋırlerdı damytuǧa erekşe nazar audaryp, ışkı turizmdı damytuǧa barlyq jaǧdai jasaudy tapsyrdy. Būl oraida atalǧan mäseleler osy joldy jöndeuge tıkelei qatysty bolyp otyr. Mūndaǧy jūmys bastalyp ta ketken. Sondyqtan būl mäselenı qysqa merzımde şeşu kerek», – dedı partiia Töraǧasy.

Al Aqtau qalasynyŋ tūrǧyny Aisūlu Qūrmanǧazieva men küieuı Jalǧas Kuvatov käsıpkerlıkpen ainalysyp, sauda pavilonyn aşudy josparlap otyr. Ekeuı de ekınşı toptaǧy mügedek.

«Bızge jūmysymyzdy bastau üşın rūqsat aluǧa järdemdesuıŋızdı jäne materialdyq tūrǧyda kömek körsetuıŋızdı sūraimyz», – dedı Aisūlu Qūrmanǧazieva.

Erlan Qoşanov partiianyŋ öŋırlık filialyna ötınış beruşılerge barynşa kömek körsetudı tapsyrdy. Ol erekşe qajettılıkterı bar adamdardy jan-jaqty qoldau – «AMANAT» partiiasynyŋ basymdyqtarynyŋ bırı ekenın atap öttı. Aqmola oblysy Şortandy kentınıŋ 8 myŋnan astam tūrǧyny auyz su tapşylyǧyn ötkır sezınıp otyr. Mäselenıŋ şeşımın ızdegen Serıkbol Merei partiia töraǧasymen kezdesuge keldı.

«Qoldanystaǧy jetı ūŋǧymanyŋ tek törteuı ǧana jūmys ıstep tūr, qalǧandarynda su qory tausylǧan. Äsırese, jaz mezgılınde egıstıkterdı suaruǧa jäne tehnikalyq qajettılıkterge köp mölşerde paidalanylǧandyqtan su tapşylyǧy aitarlyqtai sezıledı», – dedı ol.

Erlan Qoşanov būl mäselenı şeşu üşın qazırgı uaqytta toptyq su qūbyryn tartu jobasy äzırlengenın aitty. Jūmys kölemı men ony oryndauşylar belgılı boldy. «AMANAT» partiiasynyŋ Mäjılıstegı fraksiiasy su qūbyry jelılerın qaita jöndeuge respublikalyq biudjetten jaqyn arada tiıstı qarajat böludı öz baqylauyna alady. Al elorda tūrǧyny, 11 balanyŋ anasy Nūrgül Qadyrbaeva ekı ūly Arman men Anas futboldan Qazaqstan men TMD elderınde ötken chempionattarda joǧary şeberlık körsetkenın atap öttı. Söitıp, olar Portugaliiadaǧy Bsports jastar klubyna öner körsetuge şaqyrtu alǧan. Bıraq qarjylyq jaǧdaidyŋ qiyndyǧyna bailanysty bara ala almai otyr. «AMANAT» partiiasynyŋ töraǧasy batyr anaǧa jas futbolşylar üşın qajettı kömek körsetıletının aitty. Būl mäselege elorda äkımdıgı men Mädeniet jäne sport ministrlıgı de atsalysatyn bolady. Erlan Qoşanov barlyq qaralǧan ötınış boiynşa partiia filialdaryna naqty tapsyrmalar berıp, olardyŋ şeşıluın jeke baqylauyna aldy.