21 ǧasyr – äleumettık jelınıŋ qaryştaǧan zamany. Saldarynan qoǧam sekund saiyn damyp, qas qaǧym sätte türlı özgerıster de oryn alyp jatyr. Bügınde qalyŋ būqaraǧa türlı baǧytta därıs oqyp, bılgenımen bölıskış psiholog, trener-kouchtar köbeigen. Bırı «özıŋdı damyt. Täuelsız bol!» dep ündese, endıgı bırı «Dın jolyn ūstan, sonda baqytqa kenelesıŋ!» deidı.
Ärine, bılgenımen bölısu, öz oiyn aitu, keŋes beru – oryndy ärı bızdıŋ qoǧamnyŋ zaŋyna qaişy kelmeidı. Degenmen jūrtty auzyna qaratyp, lesiiasyn oqityn kouchtar qandai pozisiiany ūstanǧan? Bılgenın qalai bölısıp jür? Ony halyq qalai qabyldauda? San saual osy tübırge kelıp tıreledı.
İnstagram, tiktok, iutub jäne özge de äleumettık jelılerde qazır kouchtardyŋ paraqşasy qaptap ketken. Keibır psiholog, trenerlerdıŋ öz äŋgımelerın äsırese dınmen bailanystyryp aituy, dınge qatysty aqyl-keŋes ūsynuy trendke ainalyp ketken sekıldı. Halyqtyŋ basym bölıgı mūsylman bolyp sanalatyn elde būl äreket, olardyŋ pıkırınşe dūrys şyǧar, ärine. Bıraq zaiyrly memlekette kez-kelgen adamǧa dındı nasihattap, därıs oqu zaŋdy ma?
Qazaqstan Repsublikasynyŋ «Dıni qyzmet jäne dıni bırlestıkter turaly» Zaŋynyŋ 8 babyna säikes, elımızdıŋ azamattary, şeteldıkter jäne azamattyǧy joq adamdar missionerlik qyzmetti, iaǧni dındı nasihattaudy tek tirkeuden ötkennen keiin jüzege asyrady.
Al bızdıŋ kouchtardyŋ dıni sauaty qanşalyqty joǧary jäne olar dındı nasihattauǧa rūqsaty bar dıni qyzmetkerler me?
Odan bölek, qazırgı taŋda dınmen ūştastyryp psihologiialyq kurs satatyn kouchtardyŋ köbeiuı qoǧamǧa qalai äser etıp jatqanyn baqylaiyq. Kouch, psihologiiaǧa bet būrsaŋyz orta eseppen 10 mamannyŋ jeteuınıŋ bazalyq därısınde dınge qatysty jeke bölım bar. Bügınde psihologtardyŋ eŋ jiı köteretın taqyryby otbasyndaǧy mäsele men dınge bet būru bolyp otyr.
Bırneşe psihologtyŋ därısınde «Özıŋdı erkın sezınu üşın dınge bet būr. Dındı qabyldap, sol arqyly ömırıŋe saraptama jasa. Dın arqyly sen kez kelgen mäseleŋnıŋ şeşımın tabasyŋ» degen syndy söz tırkesterın estimız. Kei oqyrmandar psiholog kouchtardyŋ arqasynda dın jolyna kelgenın jarysa jazsa, endıgı bırı mamandarǧa kümänmen qaraitynyn jasyrmaidy.
Qazırgı taŋda dınmen ūştastyryp psihologiialyq kurs satatyn kouchtardyŋ köbeiuı, olardyŋ qoǧamǧa äserı, tigızetın ziiany men paidasy turaly būqaradan saualnama aldyq. Saualnama qorytyndysy boiynşa jauap alynǧan 25 tūrǧynnyŋ 60%-y tanymal türlı kouchtar men psihologtardy qaraitynyn, aitqan aqylyna jügınetının jasyrmady.
Saualnamadan ötken azamattardyŋ 25%-y psihologtar «dındı därıpteu arqyly qoǧamdaǧy dästürdı, qazaqilyqty ūmyttyryp, hidjab mäselesın qaita köterıp jür» degen pıkırde bolyp şyqty. Al 25 adamnyŋ 3-ı psihologtardy qarasa da, aqparatty saraptai alatynyn aitty.
Dın – normativtık ǧylym emes ekenın esten şyǧarmau qajet. Dındı qoldanyp därıs oqityndar köp. Därısterınde dındı aşyq nasihattap, «40 kündık dūǧa», «Dın men senım» syndy türlı ataumen sabaq jasaityndar da az emes.
Sol sebeptı dın mäselesıne qatysty sūraq tuyndaǧan jaǧdaida resmi dın ökılderıne jügınuge keŋes beremız.
"Adyrna" ūlttyq portaly
Ūqsas jaŋalyqtar
