«Qara Shangyraq -7» qoǧamdyq bırlestıgınıŋ töraiymy Bädigül Qajybekqyzy şet elde tūratyn etnikalyq qazaq ūltynyŋ ökılderıne berıletın memlekettık granttyŋ şetelden kelgen özge ūlt ökılderıne taratylyp jatqanyn aityp, dabyl qaqty, - dep habarlaidy "Adyrna" ūlttyq portaly.
Belsendınıŋ aituynşa, memleketımız şet elde tūratyn etnikalyq qazaqtardyŋ bılım aluyna jylyna 550 grant (bakalavr -
490, magistraturada - 50 doktoranturada - 10) böledı. Sol grantqa etikalyq qazaqtar qol jetkıze almai, memleket tarapynan ūsynylǧan igılıkten qaǧylyp jatyr. Mäselen, biyl "Enic-kazakhstan" Joǧary bılım berudı damytu ortalyǧy arqyly bakalavrǧa bölıngen 490 granttyŋ 120-syn ǧana qandastar alǧan. Qalǧan oryndardy ūlty qazaq emes afrikalyqtar, ündıster, auǧandyqtar, t.b toltyrǧan.
Bädigül Qajybekqyzy, «Qara Shangyraq -7» qoǧamdyq bırlestıgınıŋ töraiymy:
- Qazaqstan şet elde tūratyn etnikalyq qazaq jastarynyŋ elımızge kelıp bılım aluyna barlyq jaǧdaidy jasap qoiǧan. Mektep bıtırgen qūjatynda üştık baǧasy joq är qazaq balasy qūjattaryn ötkızıp, daiyndyq kurstaryna oquǧa mümkındıgı bar. Bır jyl, ary ketse ekı jyl daiyndyq kursyn oqyp, osy jaqtyŋ jazu-syzuyn üirense boldy, qalaǧan oqu ornyna memlekettık grantpen oquǧa tüse alady. Bıraq, 3 jyl qatarynan daiyndyq kurs oqysa da, tapsyrǧan emtihandarynan joǧary nätije körsetse de, jüzdegen jas oquǧa qabyldanbai qalyp jatyr. Būǧan basty sebep - sybailas jemqorlyq. Qolynda bilıgı barlarǧa para bermeitın etnikalyq qazaqtyŋ ornyn para beretın "afrikalyqtarmen" toltyrǧan tiımdı bolyp otyr...
Bädigül Qajybekqyzy "Qazaqstan Halyq partiiasy" janyndaǧy "Qandastardy ortaǧa beiımdeu ortalyǧynyŋ" da jetekşısı. Ol qandastarǧa zaŋdyq tūrǧyda kömek körsetıp, şetten kelgen aǧaiynnyŋ tegın bılım aluyna, el ışıne sıŋısıp ketuıne septesıp jürgenın aitady.
Belsendınıŋ sözıne qaraǧanda, memlekettıŋ şetten kelgen etnikalyq qazaqtardy tegın oqytuǧa aqşa bölıp otyrǧanyn köp qandastarymyz bılmeidı-mıs.
"Būl igılık turaly keŋ auqymda nasihat jasalmaidy. Sondyqtan da, şet elden kelgen qandastarǧa, qazaq jastaryna bölıngen tegın oqu ūstaǧannyŋ qolynda, tıstegennıŋ auzynda ketıp jatyr. Ol azdai endı mıne, qazaq elıne oqimyz dep armandap kelıp, daiyndyq kurstan ötıp, jaqsy nätije körsetıp, tegın grantqa ie bola almai qanşama jastyŋ qūqyǧy taptalyp jatyr. Olardyŋ tegın oquǧa tüsu qūqyǧyn qoǧam bolyp qorǧauymyz kerek" deidı belsendı.
Bädigül Qajybekqyzy daiyndyq kursyn jaqsy oqysa da, oquǧa tüse almai qalǧan jastardyŋ basyn qosyp, deputattarǧa şaǧym tüsırmek. Sondai-aq, memlekettıŋ şeteldıkterge bölgen bılım grantynyŋ kemı 90 paiyzy etnikalyq qazaq ūltynyŋ ökılderıne berılu kerektıgı turaly mäsele köterıp, Aqordaǧa hat jazbaq.
Qanat Bırlıkūly "Adyrna" ūlttyq portaly
Ūqsas jaŋalyqtar
