Qazaqstannyŋ Ortalyq sailau komissiiasyna qūjat tapsyryp, memlekettık tıl emtihanynan ötken jetı adamnyŋ esım-soiy belgılı. Endı ol azamattar qol jinau nauqanyna kırısıp ketken. Bügın sol jetılık turaly jazbaqpyz...
OSK-ǧa qūjat tapsyrǧan 9 adam:
Qasym-Jomart Toqaev;
Daniia Espaeva;
Jambyl Ahmetbekov;
Töleutai Rahymbekov;
Ämırjan Qosanov;
Amangeldı Taspihov;
Sädıbek Tügel;
Jūmatai Äliev;
Talǧat Erǧaliev.
Erǧaliev öz erkımen bas tartty
Ortalyq sailau komissiiasyna qūjat tapsyrǧan toǧyzynşy adam – käsıpker Talǧat Erǧaliev edı. Talǧat Erǧaliev «Aq jol» partiiasynyŋ ökılı. Partiia sezınde ışkı dauys beru kezınde Daniia Espaevaden az dauys jinap, ümıtker atana almaǧan. Keiın ol «Qazaqstan qūrylysşylar odaǧy» respublikalyq bırlestıgınıŋ atynan qūjat tapsyrǧan. Partiia töraǧasy Azat Peruaşevtıŋ keŋesımen, ol partiianyŋ bırıŋǧai taŋdalǧan kandidaty Daniia Espaevany qoldau üşın öz ötınışın qaitaryp aldy.
Äliev qazaq tılın jetık bılmeitın bolyp şyqty
Al Jūmatai Äliev memlekettık tıldı erkın meŋgermegenŋ sebeptı lingvistikalyq komissiia emtihanynan ötpei qaldy. Lingvistikalyq komissiia qorytyndysyna säikes, OSK Jūmatai Älievtı prezidenttıkke ümıtker retınde tırkeuden bas tartty.
Jarys jolyndaǧy jeteudıŋ jas kategoriiasy:
Qasym-Jomart Toqaev – 65 jasta;
Sädıbek Tügel – 64 jasta;
Amangeldı Taspihov – 60 jasta;
Daniia Espaeva – 58 jasta;
Jambyl Ahmetbekov – 58 jasta;
Töleutai Rahymbekov – 55 jasta;
Ämırjan Qosanov – 54 jasta.
Prezidenttıkke ümıtker retınde OSK-ǧa qūjat tapsyrǧan segız adamnyŋ ışınde 40-50 jas aralyǧyndaǧy bırde-bır adam joq. Potensialdy kandidattardyŋ ışınde salystyrmaly türde eŋ jasy – Ämırjan Qosanov eken.
Tıl emtihany
Memlekettık tıldı erkın meŋgergendıgın anyqtau üşın Ortalyq sailau komissiiasy janynan qūrylǧan lingvistikalyq komissiia OSK-ǧa qūjat tapsyrǧan 8 adanyŋ barlyǧynan memlekettık tıl emtihanyn qabyldady. Emtihan nätijesınde:
7 ümıtker memlekettık tıldı, qazaq tılın erkın meŋgergen degen qortytyndy jasaldy. Al OSK-ǧa soŋǧy bolyp qūjat ötkızgen Jūmatai Äliev 13 söilemnen 19 qate jıberıp, tıl emtihanynan ötpei qaldy. Al qalǧan jetı ümıtkerdıŋ ışınde jalǧyz Sädıbek Tügel jazbaşa jūmys kezınde azdaǧan punktuasiialyq qatelıkter jıbergen. Lingvistikalyq komissiia qorytyndysy boiynşa, ärı qarai jetı adam prezidenttık dodaǧa qatysa alady.
Endı osy qalǧan jetı ümıtker men olardy ūsynǧan ūiymdar turaly az-kem aqpar bere ketkendı jön kördık...
Qasym-Jomart Toqaev. Toqaevtyŋ kandidaturasyn «Nūr Otan» partiiasynyŋ sezınde partiia töraǧasy ūsyndy.
Toqaev bilıktegı bas partiianyŋ töraǧasy basşy boluǧa laiyq dep tanyǧan adam. Toqaevtyŋ da ülken saiasatta jürgenıne otyz jyldan asty. Jaŋa kadr, jaŋa adam dep aita almaisyz.
Toqaev – būrynǧy KSRO deitın qūrama eldıŋ Syrtqy ıster ministrlıgınıŋ būrynǧy qyzmetkerı. Ol – Qazaqstannyŋ būrynǧy Syrtqy ıster ministrı. Ol – Qazaqstannyŋ būrynǧy premer-ministrı. Ol – Qazaqstan Senatynyŋ būrynǧy töraǧasy. Ol – BŪŪ Bas hatşysynyŋ būrynǧy orynbasary.
Daniia Espaeva. «Aq jol» partiiasy sez ötkızıp, öz ışınde dauys beru arqyly 6 ümıtkerdıŋ ışınen Daniia Espaevanyŋ kandidaturasyn anyqtady.
Daniia Espaeva Täuelsızdık tarihynda Qazaqstan prezidenttıgıne ümıtker tūŋǧyş äiel adam. Espaeva – būrynǧy bank qyzmetkerı. Būrynǧy «BTA Banktıŋ» būrynǧy bas mamany. Būrynǧy mäslihat deputaty. Bank salasynda 30 jyldan astam uaqyt qyzmet etken.
Jambyl Ahmetbekov. Ahmetbekovtıŋ kandidaturasyn «Kommunister» partiiasy sezı ūsyndy. Sezge qatysuşy delegattar ony bırauyzdan qoldady.
Jambyl Ahmetbekov prezidenttıkke ekınşı ret tüskelı otyr. Ol – būryn mädeniet basqarmasyn, sosyn sport-turizm basqarmasyn basqarǧan. Ol – būryn Qorǧaljyŋ audanynda bırqatar qyzmetterdı atqarǧan. Ol – būrynǧy sailaudyŋ būrynǧy ümıtkerı boldy. Ol – būryn Nūrsūltan Nazarbaevqa jeŋılgen.
Töleutai Raqymbekov. Būrynǧy AŞ vise-ministrı Raqymbekovtı «Auyl» partiiasy ūsynǧan. Astanada ötken sezde onyŋ kandidaturasy bırauyzdan maqūldandy.
Töleutai Rahymbekov – būrynǧy biznesmen. Sätbaev qalasy äkımınıŋ, Qaraǧandy oblysy äkımınıŋ būrynǧy orynbasary. Auylşaruaşylyǧy ministrlıgınıŋ būrynǧy departament basşysy. Atalǧan ministrlıktıŋ būrynǧy vise-ministrı.
Ämırjan Qosanov. Qosanovtyŋ kandidaturasyn «Ūlt taǧdyry» respublikalyq qozǧalysy ūsyndy. Almatyda ötken qūryltaida Qosanovtyŋ kandidaturasy basym dauyspen taŋdalǧan. Qūryltaiǧa qatysuşy jalǧyz adam Qosanovqa qarsy dauys berdı.
Ämırjan Qosanov – būrynǧy jurnalist. Ol – Jastar ısı jönındegı memlekettık komitettıŋ būrynǧy basşysy. Ol – būrynǧy premerdıŋ būrynǧy orynbasary. Būl premer-ministrdıŋ jäne Ükımettıŋ būrynǧy baspasöz hatşysy. Ol – JSDP-nyŋ būrynǧy basşylarynyŋ bırı.
Amangeldı Taspihov. QR Käsıpodaqtar federasiiasy Amangeldı Taspihovty jäne eks-deputat Mūhtar Tınıkeevtı ūsynǧan. Tınıkeev memlekettık tıldı jetık meŋgermegenın alǧa tartyp, öz erkımen bas tartty. Söitıp federasiia Taspihovty qoldaǧan.
Amangeldı Taspihov būrynǧy öndırıs salasynyŋ qyzmetkerı. QR Sauda jäne industriia ministrlıgınıŋ būrynǧy qyzmetkerı. Būrynǧy Senat deputaty. Būrynǧy Mäjılıs deputaty.
Sädıbek Tügel. Sädıbek tügel OSK-ǧa qūjat tapsyrǧan alǧaşqy ümıtker. Onyŋ kandidaturasyn «Ūly Dala Qyrandary» respublikalyq bırlestıgı ūsynǧan.
Sädıbek Tügel būrynǧy jurnalist. Aqmolada oblys äkımınıŋ baspasöz hatşysy bolǧan. Būryn «Menıŋ Qazaqstanym» qozǧalysyn basqarǧan.
OSK resmi tırkegen kandidattar:
Qasym-Jomart Toqaev OSK tırkegen eŋ bırınşı ümıtker. Ol memlekettık tıl emtihanyn tapsyryp, komissiianyŋ joǧarǧy baǧasyn alǧan.
Ol Qazaqstannyŋ 17 öŋırınen 315 910 azamattyŋ qolyn jinaǧan. Olardyŋ 313 653-ı dūrys dep tanyldy.
3 mamyr künı OSK Sädıbek Tügeldı resmi türde tırkedı. Ol memlekettık tıl emtihanynyŋ jazbaşa jūmysynda punktuasiialyq qatelıkter jıbergen.
Sädıbek Tügel Qazaqstannyŋ 15 öŋırınen 122 102 azamattyŋ qolyn jinaǧan. Olardyŋ 120 175-ı dūrys dep tanylǧan.
OSK 4 mamyr künı Amangeldı Taspihovty tırkedı. Ol memlekettık tıl emtihanyn jaqsy tapsyrǧan.
Taspihov Qazaqstannyŋ 15 öŋırınen 122 770 azamattyŋ qolyn jinaǧan. Olardyŋ 119 577-ı ras dep tanylǧan. Aitpaqşy, Amangeldı Taspihov Almaty men Şymkent qalalarynan qol jinamaǧan.
OSK resmi türde tırkegen törtınşı kandidat – Daniia Espaeva. Daniia Espaeva osyǧan deiın lingvistikalyq komissiianyŋ joǧary baǧasyn alǧan.
Espaeva Qazaqstannyŋ 17 öŋırınen 144 098 azamattyŋ qolyn jinaǧan. Olardyŋ 139 541-ı ras dep tanylǧan.
Aita keteiık, osyǧan deiın prezidenttıkke ümıtker Ämırjan Qosanovtyŋ ştaby elektorattyŋ 1 paiyz dauysyn jinaǧanyn, qoldauşylardyŋ jinaǧan qolynyŋ sany 100 myŋnan asqanyn habarlaǧan.
«Adyrna» ūlttyq portaly
