«Kitap-AMANAT» jobasy otandyq ádebıetke degen qyzyǵýshylyqty arttyrýǵa, adamdardy oqýǵa yntalandyrýǵa, qazaqstandyq avtorlar men kitap shyǵarýshylardy qoldaýǵa baǵyttalǵan. Jýyrda partııanyń Almaty qalalyq fılıalynda jobanyń tusaýkeseri ótti.
Is-sharaǵa qatysqan Parlament Májilisiniń Spıkeri, «AMANAT» partııasynyń Tóraǵasy Erlan Qoshanov kitap adam ómirinde aıryqsha oryn alatynyn atap ótip, jańa jobanyń ereksheligine toqtaldy.
«Memleket basshysy Túrkistanda ótken Ulttyq quryltaıda óskeleń urpaqtyń tárbıesi men bilimine, ulttyq múddege saı keletin kitaptar basyp shyǵarýǵa erekshe nazar aýdardy. Ol kitap shyǵarý isi ıdeologııalyq jumystyń basty baǵyttarynyń biri ekenin atap ótti.
«AMANAT» partııasy Prezıdenttiń osy bastamalaryn júzege asyrý úshin barlyq óńirlik fılıalda «Kitap-AMANAT» kitap dúkenderin ashady. Ol tek kitap satatyn oryn ǵana emes, sonymen qatar naǵyz mádenı-aǵartý ortalyǵy bolady», – dedi Erlan Qoshanov.
Máselen, «Kitap-AMANAT» dúkenderinde otandyq jazýshylardyń, avtorlardyń, baspagerlerdiń qatysýymen túrli is-sharalar, jańa kitaptardyń tusaýkeseri men talqylaýlary ótedi jáne taǵy basqa. Joba Qazaqstandaǵy qazirgi zaman avtorlarynyń shyǵarmalaryn ǵana emes, jalpy otandyq ádebıetimizdi ilgeriletýdi kózdeıdi.
«Sońǵy ýaqytta ǵylymı jáne bilim berý mazmunyndaǵy kóp ádebıet qazaq tiline aýdaryldy. Bul kitaptardyń sapasy da, mazmuny da jaqsy. Alaıda, taralymy az bolǵan soń, oqyrmannyń bárine birdeı jete bermeıdi. «Kitap-AMANAT» jobasy osy olqylyqtyń ornyn toltyrady. Osylaısha, biz jazýshylar men baspagerlerge qoldaý kórsetemiz, otandastarymyzdy kitap oqýǵa yntalandyramyz deýge bolady», – dep atap ótti Erlan Qoshanov.
«Kitap-AMANAT» jobasy aıasynda «AMANAT» partııasy men Baspagerler, polıgrafıster jáne kitap taratýshylar qaýymdastyǵy arasynda ózara yntymaqtastyq týraly memorandýmǵa qol qoıyldy. Qujat aıasynda baspahanalar dúkenderdi qol jetimdi baǵadaǵy tıisti kitap qorymen qamtamasyz etedi. Onyń arasynda tek otandyq ádebı týyndylar ǵana emes, sonymen qatar álemdik bestsellerler de bolady.
Is-shara barysynda partııa Tóraǵasy jas oqyrmandarmen áńgimelesti. Sondaı-aq, kezdesýge belgili qazaqstandyq avtorlar men baspagerler: Ádil Qoıtanov, Shyńǵys Muqan, Raısa Qadyr, Almas Saqbaev, Baqytjan Buharbaı jáne taǵy basqalar qatysty.
