Shymkent qalasynyń qylmystyq ister boıynsha mamandandyrylǵan sotynda Toǵus aýylynda 9 jasar qyzdy zorlaǵan pedofılge úkim shyqty, dep habarlaıdy vera.kz.
20 jastaǵy Sottalýshy QR Qylmystyq kodeksiniń eki baby – "Kámelettik jasqa tolmaǵan balany zorlaý" jáne "Kámelettik jasqa tolmaǵan balaǵa seksýaldy sıpattaǵy zorlyq-zombylyq jasaý" boıynsha aıypty dep tanyldy. Ol 18 jylǵa bas bostandyǵynan aıyrylyp, jazasyn qaýipsizdik deńgeıi eń joǵary kolonııada óteıdi.
Sottalýshyǵa bul jazasy memlekettik aıyptaýshy suraǵan. Jábirlenýshi tarap bul sheshimmen kelispeıdi. Advokat Aıman Ýmarovanyń aıtýynsha, 18 jyl – 9 jasar qyzdy zorlap, keıin seksýaldy sıpattaǵy áreket jasaǵan adamǵa tym jeńil jaza.
"Men úkimmen kelispeımin. Ol kishkentaı balany asqan qatygezdikpen zorlady, onymen qoımaı seksýaldyq sıpattaǵy áreketter de jasaǵan. Mundaı qylmystyń biri úshin sonsha jyl beriletinin bilesizder me? Al ol eki qylmys úshin 18 jylǵa sottalyp otyr. Biz jazaǵa qatysty sot sheshimine shaǵym túsiremiz. Qalǵany ádiletti boldy dep sanaımyn", - dedi Aıman Ýmarova sot úkimi shyqqan soń.
Aıta ketsek, qylmys bıyl qańtar aıynyń basynda bolǵan. Birneshe kúnnen soń belgisiz er adamnyń Toǵus aýylynda 9 jasar oqýshy qyzdy zorlaǵany týraly belgili boldy. Qyz bala kanıkýl kezinde mekteptegi jattyǵýdan qaıtyp kele jatqan. Úıine otyz metr qalǵanda jas jigit jolyǵypty. Ol qyzdy temir jol mańyndaǵy qaraýsyz jatqan úıge súırep aparyp, zorlap tastaıdy. Osynyń bári sotqa deıingi tergeý kezinde rastaldy, deıdi advokat.
"Balaǵa eki ret zorlyq jasalǵan: zorlaý jáne seksýaldy sıpattaǵy zorlyq. Ekeýi de bolǵan, sebebi saýsaqpen jasaý bir bólek te, al mynaý bir bólek. Óte kóp jaraqat aldy. Baıǵus qyz áli dárigerge qaralyp júr", - deıdi Aıman Ýmarova.
Bala sot tergeýine qatysqan joq. 9 jasar qyz áli óz-ózine kele almaı júr eken. Kóshege shyǵýǵa qorqady, aınalasyna úreımen qarap, kez kelgen jandy jaý dep sanaıdy. Advokattyń aıtýynsha, balany emdeýge uzaq ýaqyt kerek.
"Sottalýshy bastapqyda kinásin moıyndaǵan. Keıin jartylaı moıyndaıtynyn aıtty. Ol úkimdi jumsartý úshin ǵana moıyndap otyr. Áıtpese, jasaǵan isine ókingenin kórgen joqpyn. Ol qyzdy shynymen zorlady. Bul - tolyq dáleldengen qylmystyq is", - deıdi Aıman Ýmarova.
Eki tarapta sot sheshimine shaǵym túsirmek.
Sputnik.
