Almaty oblysy, Eńbekshiqazaq aýdanynda bolǵan keleńsiz oqıǵadan keıin QR Bala quqyqtary jónindegi ýákil men QMDB arnaıy túsinik berdi. Sonymen qatar, Eńbekshiqazaq aýdanynyń ákimshilik qyzmetkerleri, Shelek aýylynyń turǵyndary, din qyzmetkerleri, meshit jamaǵaty jáne balanyń ata-anasynyń qatysýymen arnaıy kezdesý ótkeni habarlandy, dep jazady "Adyrna" ulttyq portaly.
Jıynda "Hıdaıat" meshitiniń ımamy óz qateligin moıyndap, balanyń ata-anasynan, sondaı-aq kópshilikten keshirim suraǵan. Balanyń zańdy ókilderi ımamnyń keshirimin qabyl alyp, eki tarap ózara bitimge kelgen.
"Qazaqstan musylmandary dinı basqarmasy bul oqıǵadan tıisti qorytyndy shyǵardy jáne óreskel áreketke jol bergen din qyzmetkerine shara qoldandy. Bas múftıdiń buıryǵymen "Hıdaıat" meshitiniń ımamy jumystan shyǵaryldy. Aldaǵy ýaqytta osyndaı keleńsiz oqıǵalar oryn almas úshin, ózge ımamdarmen tıisti túsindirý jumystary júrgizilip jatyr", - dedi QMDB-nyń Almaty oblysy boıynsha ókildigi.
Al QR Bala quqyqtary jónindegi ýákil Dınara Zakıeva mundaı jaǵdaıdy eshqandaı da keshirimmen aqtap alýǵa bolmaıtynyn aıtty.
- Almaty oblysynda ımamnyń namaz kezinde kishkentaı balany qolymen qaǵyp jibergenine qatysty Bul keshirýge bolmaıtyn qatygez áreket 24 sáýir kúni oryn alǵan. Vıdeo tek qazir ǵana paıda bolyp, bul adamǵa qatysty qylmystyq is tirkeldi. Osy jaǵdaıǵa qatysty Bas múftı Naýryzbaı qajymen sóılestim, qatygezdik tanytqan adam búgin jumystan bosatyldy. Onyń ımam ekenine keler bolsaq, negizi Islamda áıelderge, balalarǵa qurmetpen qaraý jáne qamqor bolýǵa qatysty kóptegen hadıs men aıattar bar. Mysaly, Muhammed Paıǵambar (s.ǵ.s) «onyń nemeresi namaz kezinde onyń basyna otyrǵan kezde, sájdeden basyn kótermegen». Qatygezdik pen zorlyq-zombylyqqa tózbeýshilik mádenıetin biz osylaı ǵana qalyptastyra alamyz, - dedi zańdy ókil.
Eske sala keteıik, áleýmettik jelide ımamnyń namaz kezinde kishkentaı balany epti qolymen qaǵyp jiberip, sulatyp túsirgen" vıdeo tarady. Vıdeo avtorynyń aıtýynsha, oqıǵa Almaty oblysy Eńbekshiqazaq aýdanyndaǵy Shelek aýylynda bolǵan.
"Adyrna" ulttyq portaly
