«Bala armanyma jetu üşın barymdy saldym» – Ädıl Erkınūly

Bügın – Qūtqaruşylar künı. Būl mamandyqtyŋ abyroiy - adam ömırın ölımnen araşalap qalatyn ǧajaiyp ıspen ölşenedı. Bügınde ört söndıru qyzmetı salasynda 6 jylǧa juyq qyzmet etıp, adam ömırın araşalap jürgen Ädıl Erkınūlymen äŋgımelesıp kördık.

Ädıl Erkınūly – Almaty qalasy Tötenşe jaǧdailar departamentı Ört söndıru jäne avariialyq-qūtqaru jūmystary qyzmetı, №1 mamandandyrylǧan ört söndıru bölımınıŋ ört söndıruşı-qūtqaruşysy. Ädıl myrza, būl salaǧa qalai keldıŋız? – Äskeri mamandyqty taŋdau bala kezden armanym. 2014 jyly Kökşetau qalasyndaǧy äskeri institutqa tüsu üşın ŪBT tapsyryp, öte almai, äskerge kettım. Özım aǧam äskeri adam bolǧan soŋ, qyzyǧatynmyn. Äskerden kelgen soŋ, «nabor» bolyp jatyr degendı estıp, qazırgı mamandyǧyma oquǧa tüstım. 2018 jyly osy sala boiynşa jūmysymdy bastadym. 6 jyl boldy. Tıkelei özıŋız adam ömırıne araşa tüsken kezıŋız boldy ma? – İä boldy. 2022 jyly qaraşada Almaty qalasy, Bostandyq audanynda (naqty mekenı esımde joq) 2 jasar qyzdy örttıŋ ışınen alyp şyqtym. Sol kezde deputat Ardaq Nazarov körıp, özınıŋ instagram paraqşasyna salǧan. Nätijesınde Memleket basşysy Q.J. Toqaevtan «Erlıgı üşın» medal aldym. Bölımşede neşe adam bar? Ūjymdaǧy ahual qandai? – Ūjym qatty ūnaidy. Tuyp ösken jerım Taraz qalasy bolǧan soŋ, sol jaqqa auysuǧa bolatyn edı. Bıraq ūjym müşelerın qimaimyn. Barlyǧy 17 qyzmetker jūmys ısteimız. Barlyǧy jaqsy, tärbielı. Ekınşı otbasymdai bolyp kettı. Otbasyŋyz jūmysyŋyzǧa qalai qaraidy? – Äielım menımen maqtanady. Anam basynda qarsy bolǧan «Qauıptı jūmys qoi, nege būl salany taŋdap jatsyŋ. Jazym degen taban astynda» dep. Äielım halyqqa qyzmet etıp, alǧysyn aluǧa ärdaiym qoldau körsetedı. Anam qazır öz oiyn özgertıp, «Oqy, köterıl, armanyŋa jet!» dep tıleules bolyp otyrady. Mereke qarsaŋynda ärıptesterıŋızge qandai tılegıŋız bar? Ärıptesterımdı merekemen qūttyqtaimyn. Batyldyq pen batyrlyq, kez kelgen jaǧdaida qūtqaruǧa daiyn bolu – ört söndıruşılerdıŋ erekşe qasietı. Bärıne beibıtşılık, baqyt, otbasyŋyz, qalaŋyz, elıŋız üşın öz qyzmetıŋızde adal jäne batyl boludy tıleimın! Mereke qūtty bolsyn! Äŋgımeŋızge raqmet!

Dinara Boranbai «Adyrna» portaly