Sońǵy kezderi qoǵamda dinı másele qyzý talqylanyp jatyr. Tamyzdyń bel ortasynda bastalǵan daý Májilismenderdiń depýtattyq saýal joldaýyna ulasty.
Caıasattanýshy Janat Momynqulov cońǵy kezderi qoǵamda dinı tartysty ádeıi uıymdastyryp otyrýy múmkin degen boljamyn aıtady. Dinı daýdyń órshýine bılik múddeli me, joq álde belgilibir top pa? Bizge ekonomıkalyq-áleýmettik jaǵdaıdy talqylamaı ózara dinı másele boıynsha daýlasý kimge tıimdi?
Osy jáne ózge suraqty Mádenıet jáne aqparat mınıstri Aıda Balaevaǵa qoıǵan edik.
Aıda Ǵalymqyzy dinı daý qazirgi zamannyń ereksheligine baılanysty ekenin eskertti. Sebebi ol áleýmettik jelide ár azamat óz oıyn jazyp, suhbattarynda óz pikirin jetkizetinin tilge tıek etti.
- Bul múmkindik Ata zańmen belgilengen. Óıtkeni adamnyń sóz jáne oı bostandyǵy Ata zańda jazylǵan. Sondyqtan bul áleýmettik jeliniń yqpaly dep oılaımyn. Al endi ony arnaıy memleket tarapynan uıymdastyrýshylyq joq. Óıtkeni biz osy eldiń turaqtylyǵyn saqtap, onyń damýyna múddelimiz. Al «Basqa uıymdar ádeıi uıymdastyryp jatyr ma?» degen suraqqa jaýap berý meniń quzyretimdegi jumys emes. Ony men anyqtaı almaımyn. Qazirgi tańdaǵy úrdis bireýdiń pikirin jan-jaqty saralamaı qatty talqylap, ózimiz oıdan shyǵarǵan pikirlerdi bildirip jatamyz. Meniń oıymsha, ol durys emes. Jalpy din máselesi óte názik sala ǵoı. Ol eń aldymen adamnyń nanym, senimine baılanysty dúnıe. Meniń oıymsha, ár din, ol ıslam bolsyn, hrıstıan bolsyn, eń birinshi izgilik pen meırimdilikti nasıhattaıdy. Ókinishke qaraı, qazir din máselesi kóbinese agressııalyq túrde talqylanyp ketti. Oǵan biz jol bermeýimiz kerek. Bul rette aqparat quraldarynyń róli joǵary. Sondyqtan biz sizdermen osy salada agressııany bildirtpeı, qoǵamnyń saýattylyǵyn arttyrý úshin birge atsalysýymyz kerek. Óıtkeni másele dindarlyqtan emes, din salasyndaǵy saýatsyzdyqtan bolyp jatyr, – dedi ol.
Májilis depýtattarynyń bastamasynan keıin Parlament dinge baılanysty arnaıy zań qabyldanýy múmkin.
Mınıstrge «Alda qabyldanatyn zań din salasyndaǵy túıtkildi máseleni sheshe ala ma? Mysaly ásiredinshil azamattar terrakti jasaýǵa umtylmaı ma? Mundaı qaýip-qater eskerilgen be?» degen suraq qoıyldy.
- Jalpy ár bir zań nemese normatıvtik qujat bolsyn, onyń saldary mindetti túrde eskerilý kerek. Sondyqtan zań jobasyn barlyq sanattaǵy azamattarmen jan-jaqty talqylanýy kerek. Men ony birneshe ret aıttym. Din máselesin depýtattar kóterip jatyr ǵoı. Ol kisilerdiń bastamasy boıynsha biz sarapshylarmen talqylaý júrgizemiz, – dedi Aıda Ǵalymqyzy.
Serik Joldasbaı
«Adyrna» ulttyq portaly
