Astanada 30 qazanǵa qaraǵan túni turǵyn úılerdiń birinde órt shyǵyp, saldarynan 72 jastaǵy áıel qaza tapty. Bul týraly aqparatty elordalyq Tótenshe jaǵdaılar departamentiniń baspasóz qyzmeti rastady, dep habarlaıdy “Adyrna” ulttyq portaly.
Áleýmettik jelilerde órt shyqqan turǵyn úıdiń aýlasy vıdeo jarııalanǵan. Kadrlarǵa qaraǵanda, órt kezinde aımaqta jaryq bolmaǵan.
Málimet boıynsha, 30 qazan kúni saǵat 00:22-de "101" pýltine Manas kóshesi, 3/1 mekenjaıynda órt shyqqany týraly habarlama túsken. Órt sóndirýshiler dereý oqıǵa ornyna attanǵan. Sóndirýshiler kelgen ýaqytta bes qabatty turǵyn úıdiń bir páteriniń birinshi qabatynda 18 sharshy metr aýmaqty quraıtyn turmystyq zattar men jıhazdar janyp jatqany anyqtalǵan.
Órt ornynan 1951 jyly týǵan áıeldiń denesi tabyldy, – delingen aqparatta.
Sondaı-aq, turǵyn úıdiń joǵarǵy qabattarynan 51 turǵyn evakýaııalandy, onyń ishinde 14 bala bar. Órtti jeke quramnyń 16 qyzmetkeri tórt tehnıkanyń kómegimen saǵat 00:44-te sóndirgen. Órttiń shyǵý sebebi anyqtalýda.
Eske salsaq, 29 qazan kúni keshke Astananyń úsh aýdanynyń turǵyndary JEO-2-degi qysqa tuıyqtalý saldarynan jaryqsyz qaldy.
