Talǵar aýdanyndaǵy saıajaı turǵyndary ondaǵan jyldar boıy órkenıet ıgiliginen oqshaý ómir súrip keledi. Saıajaı aımaǵynyń aýyl mártebesi joq, sol sebepti sol aýdan turǵyndary gazdandyrý, jaryq, tipti aýyz sýmen qamtý syndy kommýnaldyq máselelerdi ózderi sheshýge májbúr, - dep habarlaıdy «Adyrna» ulttyq portaly Tengrinews.kz saıtyna silteme jasap.
Turǵyndardyń aıtýynsha, olardyń úıleri gazdandyrylmaǵan, kommýnaldyq tólemderdi tóraǵa degenderge tólep, baǵany aıtarlyqtaı sharyqtatyp jiberedi. Munyń barlyǵy, turǵyndardyń aıtýynsha, qarapaıym ǵana sebep: Talǵar saıajaılarynda aýyl mártebesi joq. Olar saıajaılar Keńdala aýylynyń quramyna engende, máseleleri sheshiledi dep senedi.
«Jaryq úshin biz kılovatyna 32 teńgeden 40 teńgege deıin tólesek, kórshiles Talǵarlyqtar 24 teńge tóleıdi. Tóraǵalar shyǵyndarǵa baılanysty baǵanyń sharyqtap ketkenin alǵa tartady. Biz qandaı shyǵyn týraly aıtyp otyrǵanymyzdy túsinbeımiz. Jaryqty biz Eńbekshiqazaq óńirinen alamyz. Qoqys úshin aıyna 1200 teńge tóleımiz, sýdyń tekshe metri 100 teńge. Tóraǵaǵa aqsha tóleımiz, ár saıajaıdyń óz tóraǵasy bar. Árıne, olar somanyń bir bóligin ózderine qaldyrady. Gazdy jeke kompanııalar arqyly jetkizemiz. Qazir bul sán-saltanattyń quny pesh, qosalqy bólshekter jáne basqa da shyǵyndardy eseptemegende shamamen 450 myń teńgeni quraıdy», - dep shaǵymdandy saıajaı turǵyny Klara.
Buǵan deıin Keńdala aýylyndaǵy 100-ge jýyq otbasy bıylǵy qysta jylýsyz qalýy múmkin ekeni habarlanǵan bolatyn. Turǵyn úılerge qubyr tartý úshin aqsha tólep, eski kómir peshterin buzyp tastaǵandaryn aıtyp, sheneýnikterdiń aýylǵa gazben jylytý tartylady degen sózine sengen jurt. Biraq qandaı da bir sebeptermen joba toqtap qalǵan.
«Adyrna» ulttyq portaly
