«Atyraý qalalyq qurylys bólimi» memlekettik mekemesi 3-qarashada jalpy quny 1 mıllıard 267 mıllıon teńge bolatyn eki tender jarııalady, - dep habarlaıdy Adyrna ulttyq portaly Satypalu.gov.kz/ saıtyna silteme jasap.
«Atyraý qalasynan 2 bólmeli páter satyp alý» degen ataýmen jarııalanǵan birinshi memlekettik satyp alýdyń quny - 527 250 000.00 teńgege baǵalanǵan. Bul qarjyǵa eki bólmeli 19 úı satyp alynbaq. Qalalyq qurylys bólimi ár eki bólmeli úıdi satyp alýǵa 27 750 000 teńge bólgen.
Al, ekinshi tender dál sol kúni «Atyraý qalasynan 3 bólmeli páter satyp alý» degen ataýmen jarııalanyp, 20 úı satyp alýǵa sheshim shyǵarylǵan. 20 úı alýǵa oblystyq bıýdjetten 740 000 000.00 teńge jumsalmaq. Iaǵnı, qurylys bólimi eki bólmeli 19 páterdiń árqaısysyn 27 750 000 teńgege, úsh bólmeli 20 páterdiń árqaısysyn 37 000 000 teńgege satyp almaq.
Jalpy 39 úıdi satyp alýǵa baǵyttalǵan eki tenderdiń quny 1 mıllıard 267 mıllıon teńgeni quraıdy.
Tehnıkalyq sıpattamanyń «Lottyń sıpattamasy» degen bóliminde 3 bólmeli úıdiń alańy 40-60, 2 bólmeli úıdiń alańy 20-40 sharshy metrden kem bolmaýy kerektigi kórsetilgen. Al, «Fýnkıonaldyq, tehnıkalyq, sapalyq jáne paıdalaný minezdemesin sıpattaý» degen bólimde úsh bólmeli páterdiń aýdany keminde 97, eki bólmeli páterdiń aýdany 75 sharshy metrden kem bolmaýy qajettigi týraly jazylǵan. Sondaı-aq, úıdiń ár sharshy metriniń quny 370 000 teńgeden aspaýy kerektigi de kórsetilgen.
Tehnıkalyq sıpattamadaǵy bul sáıkessizdik qatelik pe? Atyraý qalalyq qurylys bólimi úshin 97 sharshy metr men 40-60 sharshy metr aýmaqtyń aıyrmasy joq pa?
Memleket áleýmettik turmysy tómen otbasylar men múmkindigi shekteýli jandardy baspanamen qamtamassyz etý maqsatynda túrli baǵdarlamalardy júzege asyryp kele jatyr. Atyraý qalalyq qurylys bólimi sol baǵdarlama aıasynda satyp alǵaly otyrǵan úılerdiń sharshy metrin jańyltpashqa aınaldyryp otyrýynyń astarynda ne bar?
Bul suraqty tıisti mekemege joldadyq. Jaýaby kelip jatsa, dereý jarııalaıtyn bolamyz.
Qanat Birlikuly
Adyrna ulttyq portaly
