Aktivterdı qaitaru aiasynda memleket kırısıne 525 mlrd teŋgeden astam qarjy audaryldy. Būl turaly bügın, 8 qaraşa Premer-Ministrdıŋ baspasöz qyzmetı jariialady, dep habarlaidy “Adyrna” ūlttyq portaly.
Qazaqstan Respublikasynyŋ Premer-Ministrı Oljas Bektenovtyŋ töraǧalyǧymen aktivterdı öndırıp alu mäselelerı jönındegı komissiianyŋ kezektı otyrysy öttı.
Komissiia «Zaŋsyz iemdenılgen aktivterdı memleketke qaitaru turaly» Zaŋ subektılerınıŋ jalpy somasy 525 mlrd teŋgeden astam qarajatty memleket paidasyna audaru jäne äleumettık jobalardy jüzege asyru jönındegı kelısımderın maqūldady. Qarajatty Arnauly memlekettık qorǧa audarumen qatar, Zaŋ subektılerı esebınen kelesı obektılerdıŋ qūrylysy maqūldandy: Arqalyq qalasynda daryndy sportşy balalarǧa arnalǧan 120 oryndyq sporttyq keşen, Astanada tırek-qimyl apparaty būzylǧan balalarǧa arnalǧan oŋaltu ortalyǧy, Almatyda erekşe qajettılıgı bar adamdarǧa arnalǧan 400 oryndyq jattyǧu ortalyǧy.
«Memleket basşysy atap ötkendei, qaitarylǧan barlyq qarajat qazaqstandyqtardyŋ igılıgı üşın jūmys ısteuı tiıs. Osy jyldyŋ basynan bastap Komissiia qaitarylǧan aktivter boiynşa jalpy somasy 900 mlrd teŋgeden astam kelısımderdı maqūldady. Būl qarajatqa bırqatar äleumettık infraqūrylym obektılerınıŋ qūrylysy bastaldy», — dep atap öttı Oljas Bektenov.
Būǧan deiın Prezident tapsyrmasy boiynşa Arnauly memlekettık qordan Aqmola oblysyndaǧy Zerendı auylynda sporttyq keşen jäne Türkıstan oblysyndaǧy Temırlan auylynda muzyka mektebınıŋ qūrylysyna qarajat bölındı.
Komissiia jūmysy jalǧasuda.
