Gerat qalasynda Auǧanstan boiynşa Qazaqstan prezidentınıŋ arnaiy ökılı Erkın Tūqymov bastaǧan resmi jäne ıskerlık delegasiialardyŋ qatysuymen bırqatar ıs-şara öttı, dep habarlaidy «Adyrna» tılşısı.
Syrtqy ıster ministrlıgınıŋ mälımetınşe, sapar aiasynda Erkın Tūqymov Auǧanstannyŋ batysyndaǧy Gerat provinsiiasynyŋ gubernatory Nur Ahmad İslamjarmen kezdesken. Taraptar sauda-ekonomikalyq jäne öŋıraralyq yntymaqtastyqtyŋ qazırgı jaǧdaiy men perspektivalaryn talqylap, öŋırlerdıŋ äleuetı jäne ısker toptar arasyndaǧy tıkelei özara ıs-qimyldy keŋeitu mümkındıkterı turaly aqparat almasqan.
«Qazaqstannyŋ men Auǧanstannyŋ batys öŋırlerı arasynda sauda, önerkäsıptık kooperasiia, kölık jäne logistika salalarynda tıkelei bailanystar ornatuǧa baǧyttalǧan «West2West» formatyn damytuǧa erekşe nazar audaryldy. Sauda-ekonomikalyq ıs-şaralarǧa Qazaqstan Respublikasy Sauda jäne integrasiia ministrlıgı, Maŋǧystau jäne Batys Qazaqstan oblystary äkımdıkterınıŋ, sondai-aq ekı eldıŋ ısker toptarynyŋ ökılderı qatysty»,– delıngen habarlamada.
Sapar aiasynda «Qazaqstan – Auǧanstan: öŋıraralyq yntymaqtastyq» atty biznes-forum ötken. Forumda özara saudany keŋeitudıŋ, käsıpkerler arasynda tıkelei bailanystar ornatudyŋ, önerkäsıptık kooperasiia men kölık-logistikalyq bailanystardy damytudyŋ praktikalyq mäselelerı talqylanǧan. Auǧanstan tarapy önerkäsıp tauarlarynyŋ, auyl şaruaşylyǧy önımderı men azyq tülık körmesın ūsynǧan.
Eske salaiyq, 2026 jylǧy qaŋtar-şılde ailarynda ekı el arasyndaǧy tauar ainalymy 581,1 mln AQŞ dollaryn qūrap, 2,4 esege ösken edı. Qazaqstannyŋ eksporty 572,9 mln dollardy qūraǧan, onyŋ ışınde ūn – 215,6 mln, bidai – 122 mln, ösımdık maiy – 51,1 mln dollar. Auǧanstannan import 8,2 mln dollar bolǧan. Salystyru üşın Qazaqstan men İran arasyndaǧy sauda ainalymy 2025 jyly 430 mln dollardy qūraǧan.
