Bas prokýrordyń orynbasary Jandos Ómirálıev Ulttyq qaýipsizdik komıteti tóraǵasynyń burynǵy orynbasary Samat Ábishtiń bultartpaý sharasyn ózgertýge negiz joq ekenin aıtty. Bul týraly ol Májilis kýlýarynda málimdedi, dep habarlaıdy “Adyrna” ulttyq portaly.
“Samat Ábishke qatysty eshqaıda ketpeý týraly bultartpaý sharasy óz kúshinde. Búginde bul shara saqtalyp otyr. Ony ózgertýge negiz joq", - dedi Jandos Ómirálıev.
Sondaı-aq, ol Ulttyq qaýipsizdik komıteti tóraǵasynyń burynǵy birinshi orynbasaryna qatysty isti arnaıy prokýrorlar tergep jatqanyn aıtty.
Eske salsaq, Samat Ábish UQK-niń ustalǵan burynǵy basshylaryna qatysty qylmystyq is boıynsha kýáger bolǵan. Ótken jyldyń shilde aıynda Ulttyq qaýipsizdik komıteti odan kýáger retinde jaýap alynǵanyn, alaıda Ábishke qatysty qylmystyq ister ulttyq qaýipsizdik organdarymen tirkelmegenin, bultartpaý sharasy qoldanylmaǵanyn habarlady.
Bas prokýratýra Samat Ábishke qatysty Qańtar oqıǵasy kezinde bılik pen laýazymdyq ókilettikterdi asyra paıdalaný faktisi boıynsha tergeý isin bastaǵan edi.
