Almatydaǵy Artmeken Gallery zamanaýı óner galereıasynda Ásel Kenjetaeva men músinshi Sanjar Dosmaǵambetovtyń «Qaýipti baılanystar» atty kórmesi ótti, dep habarlaıdy «Adyrna» ulttyq portaly InformBuro saıtyna silteme jasap.
Kórmeniń basty taqyryby – turmystyq zorlyq-zombylyq máseleleri men qazirgi qazaq qoǵamyndaǵy áıeldiń beınesi. Ekspozıııa avtorlary Ásel men Sanjar – erli-zaıypty.
«Kórme atyshýly kisi ólimimen baılanysty dep oılamańyzdar, qazan aıynda bárin oılastyryp qoıǵanbyz. Alaıda kórmeniń teńsizdikpen, qazaqstandyqtar bastan keshetin zorlyq-zombylyqpen baılanysty ekeni ras. Úkimettik emes uıymdardyń baǵalaýynsha, elimizde jyl saıyn 400 áıel jubaıynyń zorlyq-zombylyǵynan kóz jumady. Áseldiń jumystaryn sizder kórgensizder, alaıda qazirgi kúni ózekti bolyp otyrǵan soń qaıtalaýdy jón kórdik. Bul – dástúr men qazirgi zaman arasynda ájeleri men atalary sııaqty ómir súre almaıtyn áıelder týraly», – deıdi kórmeniń kýratory, ónertanýshy Valerııa Ibraeva.
Sýrettegi áıelderdiń taqqan áshekeıleri qanshalyqty ádemi bolsa da, áıeldiń únin shyǵarmaı, tunshyqtyratynyn, arqalaǵan jasaýlary qanshalyqty qymbat bolsa da, áıeldi kisendep, onyń ıyǵyna artylǵan aýyr júkti beıneleıdi dep oıyn jetkizedi ónertanýshy.
Sanjar Dosmaǵambetovtyń «7ÝIaTOFF» dep atalatyn jumystarynda zorlyq-zombylyq taqyryby anyq kórinedi. Músinderdiń denesi arqanǵa baılanyp tur. Avtordyń aıtýynsha, músinder jobasy úsh jyl boıy jalǵasyp keledi. Aldymen pishinder qurastyrylǵan, keıin skanerden ótkizilip, kompıýter arqyly óńdelip, keıin baryp basýǵa jiberilgen. Eń qıyny – sońǵy kezeń, óıtkeni Qazaqstanda 3D-prınterde músin jasap kórgen adam joq, Sanjardyń toby bul turǵyda birinshi bolyp kósh bastaǵan.
«Alǵashqy músin Qudaı boldy. Ol adamdy topyraqtan jaratty. Sondyqtan men jumys istep jatqanda onyń bar ekenin sezinemin. Jasap jatqanda anatomııa men plastıka týraly oılamaısyń, alaıda jumys bitken soń sen úshin bireý osyndaı tamasha týyndy jasap shyqqanyn túsinesiń», – deıdi Sanjar.
«Mahabbat degen ne? Mahabbat degen – Qudaıdyń ózi! Pishinder mahabbatpen jasalǵan, sondyqtan da áıel men jahannyń sulýlyǵy álemdi qutqaratynyna senemin», – deıdi sáýletshi.
Ónertanýshy Valerııanyń aıtýynsha, músinder arqannan bosap, erkindikke shyqqysy kelip bulqynyp turǵan tárizdi.
«Kórme sheshim bermeıdi, alaıda ol elimizdegi áıeldiń ornyna nazar aýdartady. Zorlyq-zombylyq, qysym, teńsizdik – BAQ pen áleýmettik jeli betterinde kóp kóteriletin taqyryptar. Ásirese, Qazaqstanda bolǵan sońǵy jaıttardan keıin», – deıdi kórme kýratory Valerııa Ibraeva.
Al Sanjardyń sózinshe, áıelge degen qarym-qatynas – qoǵamnyń deńgeıin kórsetedi.
«Adyrna» ulttyq portaly
