Izraıl Syrtqy ister mınıstri Elı Koen BUU Bas hatshysy Antonıý Gýterrıshti synady. Mınıstrdiń bul syny BUU Bas hatshysynyń Gazada atysty toqtatýǵa shaqyrýymen baılanysty, dep habarlaıdy «Adyrna» ulttyq portaly.
Buǵan deıin Gýterrısh BUU Qaýipsizdik keńesiniń tóraǵasyna joldaǵan hatynda Qaýipsizdik keńesin Gaza sektoryndaǵy gýmanıtarlyq apattyń aldyn alýǵa, sonymen birge atysty toqtatýǵa shaqyrǵan. Buǵan jaýap retinde Koen X áleýmettik jelisindegi blogynda synı jazba jazdy.
«Gýterrıshtiń bılikte bolýy álem tynyshtyǵyna qaýip tóndiredi. Onyń 99-bapty iske qosý týraly ótinishi jáne Gazadaǵy atysty toqtatýǵa shaqyrýy Hamas lańkestik uıymyn qoldaý jáne qart adamdardy óltirýdi, sábılerdi urlaýdy jáne zorlaýdy maquldaý bolyp tabylady. Búkil álemde beıbitshilikti jaqtaıtyn kez kelgen adam Gazany Hamastan azat etýdi qoldaýy kerek», - dep jazdy Izraıl Syrtqy ister mınıstrliginiń basshysy.
BUU Jarǵysyna sáıkes, 99-bapta Bas hatshynyń Qaýipsizdik Keńesine Halyqaralyq beıbitshilik pen qaýipsizdikti saqtaýǵa qaýip tóndirýi múmkin kez kelgen máseleler týraly habarlaýǵa quqyǵy bar ekendigi aıtylǵan.
Esterińizge sala keteıik, buǵan deıin qazan aıynda Izraıl bıligi Gýterrıshtiń BUU Bas Hatshysy qyzmetinen ketýin talap etken bolatyn.
«Adyrna» ulttyq portaly
