Aqyn Serikzat Dúısenǵazy marqum ulyna arnap jantebirerterlik jazba jarııalady, dep habarlaıdy "Adyrna" tilshisi.
Bıyl aqynnyń uly Álıhan Serikzatulynyń ómirden ozǵanyna jyldyń júzi boldy. Serikzat Dúısenǵazy áleýmettik jelidegi paraqshasyna jazba jarııalap, janashyr jandardy ulynyń jyldyq asyna shaqyrdy.
"Byltyr dál osy ýaqytta Álıhan meni mektebine "Maǵjan Jumabaevtyń "Pedagogıka" degen eńbegin birge taldaıyq, áke" dep shaqyrǵan edi. Asyǵyp júripti ǵoı qarǵam. Sodan beri doptaı domalap bir jyl óte shyǵypty. Óziniń oqyǵan N9 "Zerde" mektebinen "Álıhan Maqsut atyndaǵy fızıka laboratorııasyn", "Akademııa Real" qazaq-ıspan mektebinen "Álıhan Maqsut atyndaǵy robototehnıka ortalyǵyn" ashsaq dep talpynyp jatyrmyz. Alla sátin salsa, ol kún de alys emes. Balamnyń jyldyq asyn qaı ýaqytta bersem eken dep biraz oılandym. Bireýler erterek bere berseń bolady dedi. Biraq ony ózim qabyldaı almadym. Táýelsizdik merekesi, artynsha jańa jyl dep shabylyp júrgen eldiń bizge moıyn burýǵa murshasy bolmaı qalatynyn da esepke aldym. Oılana kele asty 3 qańtarǵa belgiledim. Óıtkeni 2 qańtar kúni qas qaraıa dúnıeden ótti. 4 qańtar kúni jambasy jerge tıdi. Onyń ústine 3 qańtar barlyq jer demalady. Ony da eskerdik. Sondyqtan janashyr aǵaıyndy Álıhanymnyń jyldyq asyna shaqyramyn. Ata dástúrimiz boıynsha sońǵy mindetti jıyny ǵoı. Kelip Quranǵa qatysyńyzdar", - dep jazdy ol.
Eske sala keteıik, aqyn 49 jasynda ekinshi ret uldy boldy.
