Eks-prezıdenttiń resmı saıty jarııalaǵandaı, Nursultan Nazarbaev «Astana klýbynyń» plenarlyq otyrysyna qatysty, dep habarlaıdy «Adyrna» ulttyq portaly.
Nazarbaev otyrysta el bolashaǵy men óskeleń urpaqtyń keleshegine alańdaıtynyn jetkizip, ıadrolyq qarýdy taratpaý jáne qarýsyzdaný máselesine ıadrolyq qarýǵa qarsy qozǵalystyń barlyq qatysýshylaryn belsene atsalysýǵa shaqyrdy.
– Ózderińiz bilesizder, men 2019 jyly naýryz aıynda óz erkimmen Qazaqstan Prezıdenttiginen kettim, qazir eshqandaı laýazym atqarmaımyn. Alaıda, sanaly ǵumyryn eline qyzmet etýge arnaǵan, qashanda mańyzdy oqıǵalardyń ortasynda júrgen adam retinde ózimiz, balalarymyz ben nemerelerimiz ómir súretin álemniń jaı-kúıine, bolashaǵyna árkez alańdaımyn. Jahandyq qaqtyǵystyń aldyn alý úshin álemdik saıasatta dıalog qurýdan basqa jol joq ekenine senimdimin, – dedi N.Nazarbaev.
Óz sózinde eks-basshy álemdik daǵdarystar men sonyń aıqyn kórinisi retinde birneshe tarıhı oqıǵalardy tilge tıek etti. Sondaı-aq jaqynda tusaýy kesilgen kitabynyń aǵylshyn tiline aýdarýǵa usynys túsip jatqanyn da atap ótti.
– Jalpy, keıingi ondaǵan jyl ishinde Qazaqstan kóptegen daǵdarystyń sátti sheshilýine dáneker boldy. Onyń bárin bir kezdesý aıasynda qamtý múmkin emes. Sońǵy 30 jylda syrtqy saıasatta bolǵan eń aýqymdy oqıǵalar týraly tolyǵyraq meniń jeltoqsan aıynyń basynda jarııalanǵan estelikterimde jan-jaqty aıtyldy. Bul eńbek úlken qyzyǵýshylyq týdyrdy, sheteldik baspalardan da ony aǵylshyn tiline aýdarýǵa usynystar túsip jatyr. Kitap jaqyn arada jahandyq aýdıtorııaǵa jetedi dep oılaımyn, – dedi N.Nazarbaev.
Esterińizge sala keteıik, eks-prezıdent sońǵy ret el aldyna inisi Bolat Nazarbaev qaıtys bolǵanda shyqqan bolatyn.
«Adyrna» ulttyq portaly
