Ekibastuzda sottalǵan azamat qatań rejımdegi kolonııaǵa túsý úshin túrmeden qashqan, bep habarlaıdy “Adyrna” tilshisi Sputnik.kz-ke siltep.
Ekibastuzda túrmeden qashqan azamat eki kún ishinde Pavlodar, Astana qalalaryna baryp, keıin oralyp, óz erkimen prokýratýraǵa barǵan.
Shiderti kentindegi túzeý mekemesi qazan aıynda kenshiler qalasyna kóshirilmek bolǵan. Óıtkeni mekeme ǵımaratynyń tozyǵy jetken. Alaıda túzeý mekemesin buryńǵy týbdıspanser ǵımaratyna aýystyrý bir sottalýshynyń qashyp ketýine sebep bolyp otyr.
37 jastaǵy jazasyn óteýshi 21 qazanda qonys kolonııasynan ádettegideı jumysyna ketip, qaıta oralmaǵany anyqtalǵan. Ol eki kúnde Pavlodar, Astana qalalaryna baryp, keıin qaıta oralǵan.
Sottalǵan qashqyn qatań rejımdegi kolonııaǵa túsý úshin ádeıi qashqanyn moıyndaǵan.
Qylmystyq quqyq buzýshylyq jasardan 2-3 kún buryn mekeme ákimshiligi qonys kolonııasyndaǵy sottalǵandarǵa týbdıspanser ǵımaratyna kóshkeni týraly habarlaǵan. Sottalýshy basshylardan bul ǵımarattyń ómirlerine qanshalyqty qaýipsiz ekenin suraǵan. Alaıda mekeme basshylyǵy mardymdy jaýap bere almaǵan. Densaýlyǵyna alańdaǵan sottalýshy qatań tártiptegi túzeý mekemesine túsý úshin ádeıi qashqan, - delingen Ekibastuz qalalyq sotynyń úkiminde.
Qashqynǵa qatysty qylmystyq is "jazany óteýden jaltarý" baby boıynsha qaralyp, barynsha qaýipsizdigi joǵary kolonııada bir jylǵa bas bostandyǵynan aıyrý jazasy taǵaıyndalyp otyr.
