20 jeltoqsanda West Oil Software (WOS) kompaniiasynyŋ jūmysşylary "QazMūnaigaz" ökılderımen kelıssöz jürgızuden bas tartty, dep mälımdedı Maŋǧystau oblysy Qaraqiia audanynyŋ äkımı Symbat Töretaev.
Töretaev keşe West Oil software-dıŋ narazy qyzmetkerlerımen kezdesken. Äkım narazy qauymdy sabyrǧa şaqyryp, mäselenı üstel basynda şeşudı ūsynǧan. Jūmysşylar äkım ūsynysyn qabyl alǧan.
20 jeltoqsan künı taŋerteŋ «QazMūnaiGaz» AQ töraǧasynyŋ orynbasary Däuletjan Hasanov, «Maŋǧystau Mūnai Gaz» basşysy Mūrat Mūstafaev, West Oil software basşylyǧy men Qaraqiia audanynyŋ äkımı ereuıl ötetın jerge kelıp, uaǧda boiynşa kelıssöz prosesın bastauǧa şaqyrdy.
Alaida, West Oil Software būǧan deiıngı uädeden ainyp, kelıssözdı bastaudan bas tartqan.
- Arnaiy komissiia kelıssöz jürgızuge daiyn. Būl jaǧdaidy retteudıŋ aqylǧy qonymdy joly, ony paidalanu qajet, - dedı Däuletjan Hasanov jinalǧandarǧa.
Alaida, WOS qyzmetkerlerı «QazMūnaiGaz» ştatyna jūmysqa ornalasudy talap etıp, kelıssözden bas tartty.
WOS-tyŋ bırqatar mamandarynyŋ jalaqyny «QazMūnaiGazdaǧy» eŋbekaqymen teŋestıru, QMG enşıles käsıpornynyŋ ştatyna kıru siiaqty qosymşa talaptary orynsyz ekenın eskeru qajet. Nege?
WOS-tyŋ kei qyzmetkerlerı būryn "QazMūnaiGazdyŋ" enşıles ūiymdarynyŋ qyzmetkerı bolǧan jäne 2018 jyly 5/50 baǧdarlamasyn paidalanyp, öz erkımen jūmystan şyqqan ärı atalǧan baǧdarlama aiasynda 5 jyldyq jalaqysynyŋ 50% alǧan. Ortaşa alǧanda, bır adamǧa tölenetın tölem somasy şamamen 11 mln teŋgenı qūrady. Osy sebeptı QazMūnaiGazdyŋ ETŪ ştatyna köşuı turaly talaptar da mümkın emes.
Ereuılge bailanysty "West Oil Software" JŞS künıne şamamen 23 mln teŋge şyǧynǧa batuda.
Būǧan deiın, "West Oil Software" JŞS qyzmetkerlerı Toqaevtan, öŋır basşysy Nūrlan Noǧaevtan jūmysşylardyŋ quǧynyn toqtatudy sūrap, videoündeu joldaǧan bolatyn.
Ūqsas jaŋalyqtar
