Pavlodar oblysynyń Baıanaýyl aýdanyndaǵy «Maıqaıyń-altyn» AQ shahtasynyń janynda bolǵan oqıǵanyń saldarynan qaza tapqan eki adamnyń denesi tabyldy, dep habarlaıdy "Adyrna" ulttyq portaly.
Kásibı áskerılendirilgen avarııalyq-qutqarý qyzmetiniń respýblıkalyq ortalyq shtaby bul málimetti rastap, avtobýstyń áli tabylmaǵanyn habarlady. Qutqarý jumystary jalǵasyp jatyr.
«TJD qutqarýshylary qaza tapqan eki adamnyń denesin qumnan tapty. Olardy jer betine kóterý jumystary júrgizilýde. Avtobýs tabylǵan joq, ony izdep jatyrmyz», - dep jetkizdi kásibı áskerılendirilgen avarııalyq-qutqarý qyzmetiniń respýblıkalyq ortalyq shtaby.
Ortalyq shtab qaza bolǵandardyń otbasyna kóńil aıtyp, barlyq qajetti qoldaýdy kórsetýge ýáde berdi.
Eske salaıyq, búgin túnde 4 jolaýshysy bar avtobýs shahta mańyndaǵy shuńqyrǵa qulap ketken bolatyn.
"Adyrna" ulttyq portaly
