Zańsyz berilgen jáne paıdalanylmaǵan 10 mln gektar jer memleketke qaıtaryldy. Bul týraly Aýyl sharýashylyǵy mınıstrligi aıtty, dep habarlaıdy «Adyrna» tilshisi.
«Onyń 2,8 mln gektary jergilikti fermerlerge, óńirlerdiń turǵyndaryna qaıta bólindi. Budan bólek, osyǵan deıin paıdalanylmaǵan 3,4 mıllıon gektar jerdi ıeleri ıgerýge kiristi»,—delingen habarlamada.
Mınıstrlik Memleket basshysynyń óz Joldaýynda zańsyz úlestirilgen jáne paıdalanylmaı bos jatqan 10 mln gektar jerdi memleket menshigine qaıtarý týraly tapsyrma bergenin atap ótti.
«Úkimet bul tapsyrmany 2022-2023 jyldary tolyq oryndady. Búginde aýyl sharýashylyǵy mınıstrligi eldiń strategııalyq resýrsyn utymdy paıdalaný jónindegi mindetter keshenin iske asyrýdy jalǵastyrýda. Al negizgileriniń biri – aýyldyq okrýgterdegi eldi mekenderdiń aınalasyndaǵy jaıylym tapshylyǵyn azaıtý»,—dep tolyqtyrdy basqarmanyń baspasóz qyzmeti.
